【add】紅人主場：劉青雲野蠻好老公
1 :
GS(14)@2016-08-11 06:08:40■劉青雲外表冷酷，其實是幽默風趣暖男。
劉青雲從影以來拍了過百套電影，是不少人心目中的平民影帝。和港姐冠軍郭藹明結婚18年，零緋聞，形象正面，兩公婆甜蜜恩愛，他笑言全靠老婆演技一流，原來甜蜜背後兩公婆經常因小事而耍花槍，自認天生野蠻的青雲，在多年的婚姻生活中學會了互相尊重，一句簡單的「Thank you」，氹太太開心，做個窩心暖男。統籌：林妙萍撰文：顏英儀攝影：郭賢興攝錄：林德雄、葉君海化妝：Jun Ho of Suave髮型：Monida Tse場地：The Mira Hong Kong
■青雲自言被稱為男神是一種不幸。
劉青雲同太太郭藹明結婚18年，零緋聞，兩公婆恩愛非常，在太太眼中青雲是她的黑馬王子，問到青雲是如何保持婚姻甜蜜新鮮？他幽默說：「佢係演員，演得好囉！其實我哋好似一般夫妻冇乜分別，只係我哋成日出街畀人影到，結婚近20年，我覺得真正嘅我係我太太最清楚，咁多年當然有唔少改變，都係一個挑戰，因為我太太係一個幾有禮貌嘅人．對我好客氣，成日講『唔該』、『麻煩晒』，有時會覺得生保咁，唔可以因為兩個人結咗婚而冇晒禮貌、又老奉，其實唔該吓、thank you，太太個心都會舒服啲。」
我係野蠻人
甜蜜背後，原來兩公婆經常為小事而耍花槍，他幽默說：「我哋成日都有爭執，因為我係一個野蠻人，你睇我個樣就知啦，我唔係一個講道理嘅人，因為大家對事物有唔同睇法，有時我覺得藍色好睇，佢就覺得白色好睇，你問我點解，其實冇道理講，亦都好難去解釋，有時同一樣嘢嗌咗十幾廿年，因為大家講完就算數。」婚後太太專心照顧家庭，青雲又是否支持她復出拍戲？「呢個係佢嘅選擇，我就冇所謂，相信每一個人都想自己可以嘅時候做自己想做嘅事，將來唔好後悔就得，我唔介意太太拍戲，純粹個人決定。」
■劉青雲在Facebook貼了與太太98年的婚紗照。
■跟太太郭藹明結婚18年，青雲自言多年的婚姻生活學會了互相尊重。
唔怕做甘草
雙料影帝劉青雲，由電視圈走到電影圈，從影30多年演繹過無數角色，可有想過一天執導演筒或做其他工作？「仲未諗到想拍乜，我相信當我諗到一個我想拍嘅故事我會嘗試做導演；其實我仲有好多嘢想做，我一路都希望將自己想做嘅事喺電影出現，好似揸飛機，如果拍戲做機師都應該幾好玩，我相信演員會係我嘅終身職業，我唔介意將來畀人話我係甘草演員，就算而家話我都會唔介意，因為把口生喺人哋度。」
男神是不幸
近年男神、女神當道，青雲也是不少女士心目中的男神，不過他一聽到男神二字就苦笑說：「大家稱呼我為男神其實係一種不幸，我點會係男神，老實講我都唔知男神係要有乜條件同質素，可能大家興咁稱呼，所以就被歸納為男神。」工作以外，青雲平時都喜歡閱讀不同書籍和行山放狗，選擇過自在的平民生活，「近期我睇緊一本關於咖啡同關於恐怖分子嘅書，平時放假就會行山放狗，都會行街市買餸，去街市買餸啲人都會認得我，都會搭多條葱畀我。」
■青雲於新片《危城》與古天樂有不少對手戲。
■為了拍戲，提早到肇慶練習長鞭。
長鞭訓練冇受傷
近年劉青雲一年拍3至4部電影，其餘時間就陪太太，早前他就去了肇慶拍攝新片《危城》，對手有古天樂、彭于晏和吳京，戲中青雲有不少動作戲份，要練習長鞭，「好耐冇拍過呢類動作片，之前去咗當地訓練一個禮拜，武指教我長鞭基本訓練，好易打中自己，訓練時身上要戴晒保護pad，練完之後件衫會花晒，幸好冇受傷。」更多精采時尚內容，盡在
http://add.appledaily.com。
來源:
http://hk.apple.nextmedia.com/entertainment/art/20160811/19731177