|
||||||
|
由戚其義監製的無綫劇集《天與 地》週日（一月一日）播出大結局，雖然衝破30點，不過劇集播出以來收視一直低水，更被指隱喻六四，涉及政治話題被內地國家廣電總局落令禁播，愈禁愈熱， 《天與地》結局篇被網民追捧成為神級經典，可惜已觸動中方神經，隨時累街坊令無綫其他劇集受牽連。據了解，高層為補鑊，勒令戚其義停產一年，不甘被祭旗的 他，遞信劈炮唔撈。一人孭鑊 在網上大熱的《天與地》上月二十七日被國家廣電局落令禁播，據了解，監製戚其義在禁制令未正式公布前已經聞到味，而早前在訪問中坦言電視劇內容是有關六四 的編審周旭明，亦在微博表示劇集惹來「官方」不快，乃個人責任，不涉及任何演員同事，更自爆半年後離開無綫。 《天與地》惹禍有排煩，正在放大假的戚其義亦專登返公司，接受訪問澄清劇集內容並無影射六四，但礙於大陸是公司主要賣埠市場，為免因小失大，無綫即時作出 補鑊行動，由集團總經理李寶安親自落令，搵親信區偉林傳話，叫戚其義停產一年。 「李寶安用嘅理由當然唔係話驚得罪中央，而係數番晒阿戚（其義）自從《金枝慾孽》之後，拍嘅劇集全部大卡士，大製作，但收視就唔掂，對其他慳住使嘅監製好 唔公平，所以叫佢停一年唔好開劇，不過照樣會有糧出。阿戚覺得唔俾佢做嘢係一種侮辱，況且佢之前都同身邊啲同事提過話想出去闖吓；而家公司搵佢孭鑊，佢當 然嬲到震，即時遞信劈炮。 「其實珍姐（曾勵珍）啱啱先升咗阿戚做戲劇分部經理，佢一定要撐阿戚同公司力爭，加上有分量嘅監製都走得七七八八，好似梅小青同劉家豪四月就過檔NOW， 如果連阿戚都走埋，真係唔夠人用，珍姐而家好積極留緊阿戚。如果阿戚堅持要走，都係半年後嘅事，佢個位辭職要六個月通知。」知情者說。 演員受牽連 戚其義隨時走人，他籌備多時的大製作《金枝慾孽2》亦有機會由他人接手。據了解，經今次事件，大陸未必會放生阿戚其他作品之外，就連劇中演員亦可能受影 響。「劇集係無綫品牌，對公司嚟講，可能邊個做監製都冇影響，最緊要係大陸市場肯要。不過啲演員就最無辜，禁制令一出，林保怡、佘詩曼、陳豪成班都已經收 聲，事關牽涉到政治層面，大陸最忌就係呢樣嘢；雖然冇人出嚟話封殺班演員，不過內地班老闆暫時唔會搵佢哋做嘢，大家都怕得罪中央冇運行。」知情者說。被內 地封殺，週一下午，由屋企駕車外出買麵包的戚其義回應時十分吞吐：「都冇嘅。」隨即跳上車離開。 惹火劇 被戚其義喻為拍劇以來最滿意作品的《天與地》，雖被無綫當倉底貨擺足兩年，出街後又慘遭內地封殺，但大膽新穎題材，為乏善可陳的港劇掀起一個又一個的爭 議，連華爾街日報都要報導封殺《天》劇，輸收視，贏風頭，有賺！ 隱喻六四 編審周旭明曾說該劇靈感來自「六四」，劇中三個男主角雪山食人求存後的不同表現，間接令人聯想與「六四」屠城後民運人士及中共黨員的態度；加上劇中提及法 輪功與徹底解體中共橫額的鏡頭，政治味濃，難怪觸動中方神經。 雪山食人 歷年來港劇無論係爭產抑或爭女，有理無理都加插槍戰。難得《天》劇有雪山食人咁「新奇」，師奶觀眾話接受唔到，但人性寫實中晒年輕觀眾口味。接受或拒絕， 都成為網上熱話。 出金句 難得無綫編劇度到反映時弊的精心對白，劇中Joe Junior一句「This city is dying」及佘詩曼在結局的對白：「和諧唔係一百個人講同一說話，係一百個人講一百句唔同說話，而又互相尊重。」反映人民心聲，成為《天》劇金句，網民 激讚。 |
||||||