鄰居搬走變瘠土 農夫失收心淡
1 :
GS(14)@2016-06-06 02:49:34【本報訊】馬屎埔村裏疏疏落落的還有些農民耕作，六旬村民區先生是其中一位。記者日前採訪，穿上長袖白衣長褲的他，下午2時許在農地上埋頭苦幹，田上種滿蔬菜，近看才知菜葉全被蟲蛀出一個個洞，「啲蟲肥過肥豬仔！」區先生隨手拿起一條菜蟲，蟲蜷起有半隻手指頭大。反抗收地的人希望農業復耕，但務農的區先生只有萬般無奈，「你估（務農）好好玩呀？真係好辛苦㗎！唉。」
「收咪收，根本種唔到嘢」
月多雨水，農作物抵不住惡劣天氣失收，「種咁耐都未試過，兩三日之間（菜蟲）全部搞掂晒你，唉！」區先生不斷唉聲嘆氣，「（今年）冇樣好，你問吓對面個阿婆吖，係種薑、種芋頭（才有收成），冇辦法啦」。區先生說，住在馬屎埔60多年，以前每戶都有種植，環境還算較理想，「知唔知啲蠓點嚟？樹葉漚出嚟！」他指以往農民會趁樹長出前將它砍掉，因樹木會扯走泥土營養，但隨着旁邊住戶遷走，雜草早就無人打理，樹木亦變多。他直言務農太辛苦，日曬雨淋更要抵擋鄉郊惡蚊，又不是能夠賺大錢，「講得難聽啲，要收（地）咪收囉，根本種唔到嘢」。他手把蛀壞的菜心逐棵拔起，口裏對於村口示威不置可否，「每個人有每個人理想，政府嚟講，一收全部都收，唔會剩番你，得番你喺度，幾棟大廈圍住你，咁你點呢？」老農夫隨遇而安，「好多時外面嘅人睇係好，但裏面住嘅人唔鍾意。冇話捨唔捨得（馬屎埔），你住喺度耐咗就會心淡」。■記者袁楚雙
來源:
http://hk.apple.nextmedia.com/news/art/20160603/19639212