笑到最後：畢菲特點解買蘋果
1 :
GS(14)@2016-05-24 10:41:49所以話，有啲嘢，現場睇，同睇直播，係兩回事。最近股神畢菲特旗下投資旗艦巴郡向美國監管機構提交的文件中披露買入蘋果公司981萬股，咁大件事當然好多本地股評界評論，點知一睇，發現大家都唔係太了解畢菲特做緊乜，又話睇好科技股又話蘋果估值，其實唔關事。
早已超越炒股票
今年巴郡股東會最精警的一條問題，要數第一條，台上女記者Carol Loomis代股東發問問題，話以往股神推崇細價股、小型資本，家陣買親都係資本密集，係咪轉咗軚？基本上，全個股東會，股神對收購有兩個睇法：一、擁抱資本密集股份；二、挑選贏家。《華爾街日報》記者問過畢菲特，後者話買蘋果單刁佢冇份決策。但高明認為，呢個反而唔係重點，因為喺得巴郡打工，理念同手法都相近，唔會無啦啦轉咗技術分析。而買蘋果，同係咪科技股無關，同上述兩項準則更有關係。蘋果係科技公司，生產線外判晒出去，唔需要重大資本投資機器同廠房，唔算得上資本密集，但有一樣特質同資本密集好似，就係新加入競爭唔易。資本密集公司因為投入大，通常競爭唔多，公共資源、電網、鐵路、基建，唔係想開就開，有一定程度壟斷。智能手機大戰都打得七七八八，贏家不外乎蘋果、Google同三星，小米可能已經係呢轉最後加入者，再新入行造Andriod手機好難賺錢，賺錢尾班車開咗。蘋果雖非資本密集公司，只要下一個喬布斯未出現破壞現有智能手機生態，蘋果都會坐擁壟斷地位。第二，只係佢選贏家，蘋果明顯係贏家，手執手機硬件同埋App Store，手機有「蘋果溢價」，App Store基本上係自成一個生態，比起Google好嘅地方，全線自己食晒，唔使畀其他手機生產商分咗手機嘅盈利。有人會話巴郡買蘋果，係錯過咗之前龐大升浪，食咗水尾先嚟買，唔符合價值投資精要。但係畢菲特喺股東會明言，股票師承格拉咸，做生意跟芒格學嘢，而巴郡嘅規模，早已超越炒股票，揀贏家嚟買，係佢嘅生意手法。再深層次啲，就係畢菲特對負利率嘅憂慮，同埋覺得美國會繼續繁榮，低息甚至負利率令現有企業唔會失敗，因為永遠有銀行借錢救，而經濟向好則傾斜現有贏家。至於應唔應該跟股神畢菲特一齊買蘋果，其實佢短線買嘢都幾燈，例如買IBM，都係科技股，平均入市價係172.8美元，周五收市報147.24美元，今年頭最低見過117美元，跌咗三成，無佢咁多錢，真係可以有啲耐性，等吓先跟。高明
http://www.facebook.com/bigricetea本欄逢周一刊出
來源:
http://hk.apple.nextmedia.com/financeestate/art/20160523/19623072