馮仁昭四圍超：跑山練心肺發哥生日老婆送山水蛋糕
1 :
GS(14)@2016-05-21 18:29:45■發哥前日61歲生日，發嫂訂做咗個有齊發哥興趣嘅3D蛋糕，氹到發哥好開心。
周潤發前日61歲牛一，發嫂陳薈蓮約咗一班好友喺銅鑼灣西苑酒家食生日飯，發哥一到場啲職員就熱情款待，讚佢越嚟越後生有型，氹得發哥好高興。發嫂為咗畀驚喜老公，一早訂咗3D生日蛋糕，上面有山水小溪、相機、單車同電影菲林，全部都係發哥喜歡嘅嘢，搞到發哥好感動。
■發嫂唔止送蛋糕，仲送咗香吻畀發哥。
愛上運動停唔到
在場好友大讚個蛋糕好靚同有心思，發哥就對住老婆話：「老婆都係你最知我心意，多謝你！」問發哥有乜生日願望？佢話：「身體健康，做人開開心心囉！不過對我人生最大啟發，係呢兩年開始頻頻行山同做運動後，我發現成個人都精神咗好多。以前成日搵中醫睇，以為食下中藥調理身體係最好，但自從愛上跑山，整個人嘅心肺功能都比以前好咗好多，跑住上山成個鐘都冇氣喘。」發哥仲話冇得做運動會周身唔舒服。發哥忠告大家，如果想身體好，運動就一定要做，只要養成習慣就肯定唔會停，成個人精神爽利，病痛都會少好多！撰文：馮仁昭
來源:
http://hk.apple.nextmedia.com/entertainment/art/20160520/19619269