ZKIZ Archives


【今日最好炒】直擊Le Creuset開倉

1 : GS(14)@2016-04-13 16:58:46

近期Le Creuset係7-11有小餐具換,上至媽媽級、下至女神兵、OL等等,都爭相換領。一套10件小餐具連木架仔,炒價高見2200蚊,價錢拍得住真煲,LC迷仲可以去佐敦逸東酒店2樓掃返轉,做埋今日最後至晚上7點,有買趁手!記者昨朝一早去咗佐敦Le Creuset開倉,朝早十點幾人流不算多,不用排隊就直入場內,職員表示周日因天雨關係反而較少人,周一人流最高峯,而今日為最後機會,公關表示過往一年會有兩次開倉,主要在春季及秋季,今年就第一次開倉。入場前可以以20蚊按金租借一個購物袋,離場時交還可取回按金。場內人頭湧湧,九成九為女士,不少連群結隊一齊掃貨。鑄鐵鍋等較重型的廚具主要放在牆邊架上,以橙色紙盒裝住,上面有顏色標籤原價及開倉價;而瓷器杯、碗、碟等產品就主要在場中央。產品折扣上,職員表示最多三折,最平50元買到個油掃,如果新手的話,除了餐具一百幾十蚊容易入手外,職員強烈推薦要買LC孖寶,包括20cm鑄鐵鍋,原價2988元,開倉價1330元,平五成半;以及26cm方型鑄鐵坑紋煎pan,原價1998元,開倉價980元,平足一半!開倉買孖寶,較原價勁慳2666大元。不過,場內遍佈地雷!好多買家買到一地都係,主要因為買太多太過重,唯有在地上拖行。未到11時場內人數已經過多,職員開始限時,大螢幕倒數45分鐘一節。所以不少粉絲買完一節唔夠喉,再排隊買多輪,加上LC鑄鐵鍋出名重磅,小記買了一個煎pan都重到拎唔到咁濟,真心佩服場內買完又買的買家們,臂力相當驚人,分分鐘去奧運舉重都得!





來源: http://hk.apple.nextmedia.com/financeestate/art/20160413/19569096
PermaLink: https://articles.zkiz.com/?id=299173

Next Page

ZKIZ Archives @ 2019