📖 ZKIZ Archives

法國唔係意大利 左丁山

2011-11-14  AD

法國紅酒商人 S從香港搬咗去新加坡近兩個月之後，呢日回港，走上陸羽搵我地一齊飲茶，法國 S話新加坡生活尚好，只係天氣太熱，有時令佢吃不消，而且新加坡整個城市唔夠香港咁「刺激興奮」，若非在新填海區嘅「金莎」賭場提供火花，帶旺 Marina Bay一帶，更加悶。既然咁樣，何解要遠自法國移民香港，跟住就遷往新加坡呢？無他者，香港租金貴係原因之一，之二就係佢啲仔女要入學讀書，而新海外移民 子女要進入法國 S喜歡嘅國際學校，難度甚高。新加坡就唔同呢，租金便宜好多（雖然法國 S係有錢人，但佢唔係好似恒豐酒店後人咁有錢呢，使錢都要覺得物有所值至得），外國人進入國際學校，比本地人有優先權（如果香港有此事，一定會有人申請司 法覆核，兼向平機會投訴到暈）。
最近歐洲豬國債務問題，搞到天下大亂，「金融市場」波動，提起就怕，市場又怕 S&P調低法國信貸評級，驚惶不安，左丁山於是順口問吓法國 S：「薩爾科齊能否穩定局面，令法國不會變成意大利？」法國 S拍晒心口話：「唔會嘅，雖則法國人唔多鍾意薩爾科齊，但呢位總統政治手段了得，佢啲最大政敵會好奇妙咁自我毀滅，例如 DSK（按：前 IMF總裁科恩），佢仲大打溫馨牌，努力造人，太太果然有得生，好嘢！而且法國有一個龐大雄厚工業根基，時裝、藥物、科技都名列世界前茅，可以頂得住嘅， 最多係有驚無險！」
薩爾科齊係政客人辦，變色龍靈活變化，敵人捉佢唔到，咬佢唔親，譬如佢曾經接見達賴喇嘛，激怒北京，但見完之後就猛咁向中國示 好，最近歐盟峯會之後第一時間打電話向胡錦濤匯報，面孔轉變之快，四川變臉大師也要佩服。香港公民黨班大狀如果真的要在當紮時期搞政治，唔去搵錢嘅話，不 妨研究薩爾科齊之轉軚風格，否則嘅話，如梁家傑話齋，要當紮大狀每日落區工作十小時，係好艱難嘅，留在中環每日打官司上法庭搵真銀好過啦，做乜要參與選 舉，輸咗又賴蛇齋餅糉啫？

PermaLink: https://articles.zkiz.com/?id=29359
Next Page
ZKIZ Archives @ 2019