馮仁昭四圍超：宋熙年陳智燊擺酒「最想搞三次」
1 :
GS(14)@2015-09-09 07:21:52■宋熙年同陳智燊噚日手拖手登場，全程表現恩愛。
陳智燊喺7月秘密到澳洲向宋熙年驚喜求婚後，噚日以準夫妻檔現身銅鑼灣一個礦泉水活動，兩個着到襯晒色咁手拖手出場，又向市民派水。今次係佢哋公佈婚訊後首次出席公開活動，叫價應該更加高，陳智燊話：「唔知呀，應該唔會嘅，要問經理人。」有傳佢哋會喺年底擺酒？陳智燊話：「年底快得滯，我父母喺英國，佢父母喺澳洲，兩個媽咪見過面，但雙方屋企人就未見過。」宋熙年補充指：「有啲習俗同傳統，睇吓有乜要做，畀多啲時間佢哋商量。」問佢哋婚宴搞三次定一次過？陳智燊抹晒汗咁話：「計一計條數先，能力範圍內做到嘅都想做。」宋熙年又話：「最理想係搞三次，不過盡力而為啦！」
■陳智燊同宋熙年仲用手機同粉絲玩selfie。
先婚後Plan B
有傳佢兩個馬鞍山築愛巢趕生B，陳智燊否認話：「結咗婚先計劃plan B。」宋熙年想按部就班，如果一次過發生要好多嘢配合，所以係唔會有其他喜訊。陳智燊都唔想有意外，想賺多啲錢，籌夠錢喺三個地方擺酒。對於最近有唔少人離巢，陳智燊指自己同無綫仲有幾年合約，而宋熙年就仲有一年，佢話，「結咗婚唔會唔做嘢，怕被社會淘汰。」撰文：馮仁昭
來源:
http://hk.apple.nextmedia.com/entertainment/art/20150909/19287543