【專題籽】插畫家記錄油麻地街坊餵貓 住嗰區畫嗰區
1 :
GS(14)@2017-04-08 19:40:39【專題籽：胚芽故事】圍着棋盤聚賭的老伯、石凳上打瞌睡的大叔、鋪墊露宿的無家者、在天后廟前拍照的外國遊客，空氣隱含香燭氣味，卡拉OK歌聲自廟街傳來……這裏是油麻地榕樹頭。「榕樹頭容納到好多唔同背景嘅人，黑白兩道嘅人共存但又未至於會衝突，係個好融洽嘅地方。」對，還有她，這身形瘦小雙眼明亮的插畫家亦是這裏常客。
她是柯慧惠（慧惠），一位八十後插畫家，最愛繪畫社區小店，以細膩筆觸記錄眼中的香港，「尤其鍾意畫人，因為唔同社區嘅街坊或者小店老闆都有自己個性，有時同佢哋傾偈，鍾意咗佢哋喎，就會覺得如果可以畫低佢哋就好啦，尤其是可以畫得比佢哋現實上更加靚，咁我就好有成功感。」說罷做了個「阿媽我得咗啦」的動作，這般活潑模樣，怎麼和坐在地上靜靜作畫的她，看似有點落差？細談下，會發現這乍看安靜甚至帶點靦腆的女生，只要說起畫畫就會突然手舞足蹈起來，「一來好想享受畫嘅過程，想畫慢啲，但二來又覺得，仲有好多嘢未畫，點算呢？」她眉頭一皺，語速漸快：「係咪應該加快速度呢？係好矛盾，跟住就嗚呀呀呀……結論都係要努力繼續畫多啲啦。」說時雙手模擬加速跑步狀，講到咁肉緊，無非因為對畫畫的熱愛。
慧惠親身捕獲秋爸，希望畫下他十八年來照顧流浪貓的故事。
這裏數十隻流浪貓，全由秋爸每日親自烹煮鮮魚，和義工悉心照料，養得肥肥白白。
這是慧惠筆下的秋爸故事速寫完成圖。
一街之隔盡顯貧富懸殊
由2014年畫雨傘運動，到畫單車舖、文具店等各式小店舖、小人物，慧惠喜愛畫舊區，觀察裏面隱藏的時間痕迹。作為土生土長的油麻地人，她希望在年尾出一本畫集，繪畫油麻地不同社區空間及人物故事，作為「給油麻地的情書」，「因為好多時都會話，住得越近嘅地方，反而越唔了解個地方。」她舉例說，畫油麻地期間才觀察到，窩打老道8號變成了離地私人住宅，「你會見到佢第一層已經由五樓開始，因為對面就係垃圾站同露宿者之家，貧富懸殊喺兩條街之間好清楚咁見到。」又提及油麻地戲院，從自小經常看到的三級片海報，到現時改建成「好正氣的戲曲表演場地」；百老匯電影中心附近亦興起自由定價餐廳等新型小店，變得更多元化，「除咗彌敦道嘅繁忙連鎖店，其實當你行落幾條街，行到去上海街、新填地街甚至窩打老道果欄，仲有好多好多嘢可以慢慢行、慢慢睇，唔使行大商場，喺呢啲舊區都夠你hea足成日。」以為畫畫是缺乏社交機會的活動嗎？其實不然。像訪問當日，慧惠坐在天后廟前畫畫，漸漸有人靠攏圍觀，由阿伯、嬸嬸、學生、母女、外國旅客、南亞街坊，說得出都有，「佢哋睇住我畫畫，好多時同我傾偈嘅都係南亞裔人，會用英文問我：『你點解會畫呢度呀？畫得幾好喎！』媽咪嗰輩有時都好慷慨咁讚我，伯伯通常比較沉默，望你十分鐘就走。」透過現場作畫並與街坊交流，她收集到更多社區故事，如訪問當日她繪畫的餵貓義工，正是其中之一。事緣有街坊問她知否有一名叫秋爸的街坊，餵養數十隻流浪貓，每日風雨不改一餵十八年，於是慧惠決定親身捕獲他，「秋爸會就住唔同貓嘅口味，買唔同魚，一碟碟遞上去畀流浪貓。」本身也是資深貓奴的慧惠，決定畫下秋爸的故事，收錄在暫名為《給油麻地的情書》的畫集內，「希望透過畫，分享畀唔同人知道，原來香港仲有咁好嘅人同事。」
常說住得越近的地方反而越不了解，慧惠（右）決定畫她居住了多年的油麻地，她眼中的榕樹頭有無家者、年輕人、外國遊客、清潔嬸嬸和抽煙老伯。
慧惠在雨傘運動畫彌敦道期間認識了榮興單車鍾老闆（左圖中），「佢路過見我畫，話：『都唔錯喎，不如你去我間舖畫啦。』」
Facebook：慧惠
記者：封愷瑜攝影：潘志恆（部份照片由受訪者提供）編輯：陳漢榮美術：利英豪
來源:
http://hk.apple.nextmedia.com/su ... t/20170407/19981915