ZKIZ Archives


時運不濟 左丁山

2011-11-04  AD

左丁山一位朋友在八十年代不斷得到獵頭族垂青,鍾意佢在長春藤名校畢業,識得日文,有亞洲經驗,於是從大商業銀行跳槽 Kidder Peabody, KP被收購後,去咗 DLJ,呢間垃圾債券製造廠唔掂,轉去 Paine Webber, PW俾瑞銀收購,轉去 Paribus,又被法國巴黎收購,於是跳去貝爾斯登,再被雷曼兄弟挖走,結果係呢兩間投行都煙消雲散。左丁山好服佢每次都「中」,好在佢樂天知命,對薪 酬福利要求永不獅子開大口,憑佢老練經驗,仍然搵到工做。
呢日睇新聞,明富環球申請破產保護令,分析 P打電話嚟講:「唉,阿顏又中!」講乜嘢呀,分析 P解釋:「阿顏係一流地產分析師,但佢做過百富勤,貝爾斯登皆以破產收場,今次做 MF Global,又係申請破產,你話幾運滯呢!」唔算運滯,公司衰咗,自己冇事就得啦。左丁山一位大師兄有博士學位,早已移民美國,八十年代初做儲蓄貸款公 司( Savings& Loans),遇上大風暴,全美 S& L瓜直,佢連長俸金都冇埋,後來做另外一間大公司,去到 2001年,就快退休嘞,點知遇上安隆( Enron)破產,間公司有若干業務受牽連,做埋陪葬品,大師兄嘅公司長俸再次冇晒。在美國打工,冇咗公司 pension,只靠平時儲蓄與社會保障金嚟應付退休,相當冇癮,碰中呢啲事情先至真係運滯。
明富環球死在賭歐債,行政總裁 Jon Corzine以前係高盛聯席總裁,美國參議員,新澤西州州長,本來叱咤風雲,輸咗選舉之後,重投故業,以為憑自己名聲,可以建立一間「小高盛」,點知碰 上歐債危機,賠上個人聲名與公司財產,累及銀行(摩根大通與德意志係大債主)。一啲大銀行嘅大人物離開大銀行之後,往往以為自己過去咁掂,自立門戶冇理由 唔得,誰不知人貴知己知彼,不知己就埋下失敗伏筆。過往在大銀行揸鑊鏟炒到聲名遠播,你估真係自己係無敵天才呀?唔係呀,大銀行嘅商譽與資本雄厚其實係保 護傘,離開之後創業,冇大量資金支持,炒得兩炒就變咗乾炒,被對手挾番轉頭,無路可退,只得舉手投降, Corzine在高盛就有人俾面啫,在 MF Global點會有得威吖!

PermaLink: https://articles.zkiz.com/?id=29150

Next Page

ZKIZ Archives @ 2019