股壇「不死人」親述 大時代必勝法
1 :
GS(14)@2015-06-17 14:22:112015-06-10 EW
《大時代》本周才進入大結局戲肉，內地股市上周四卻率先出現「大奇迹日」
，滬深指數一度暴跌，其後卻「V」形反彈倒升收市。覆巢之下焉有完卵，一河
之隔的港股亦一度大瀉逾六百點，小股民嚇至面青，市況之兇險，叫人心膽俱
裂！
過去四十多年，港股經歷多個大時代：七三股災、八四年信心危機、八七年停
市四天、九七年亞洲金融風暴、○三年沙士、○八年金融海嘯、一○年歐債爆
煲。股海幻變，淘盡多少風流人物，怎不教人欷歔。
神劇中股神葉天縱橫股壇數十載，未嘗見過一個真正贏家，因而悟出唯一必勝
法是「及早離去」。股市輸贏，其實是人性寫照，四名跟香港股壇隨風起浪的
老行尊王啟銘、詹培忠、張天生和張華峰，以眾人皆醉我獨醒的態度看待今天
的大時代，親述自己的股市「必勝法」，以及種種「缸」湖恩怨，恍如投資界
的暮鼓晨鐘，令頭腦發燒的股民清醒一下。
我認為個市會跌，炒得咁緊要，仲未跌定！」王啟銘上周五在交易廣場對面的
新同得有限公司接受本刊獨家專訪，精神抖擻地說。
八十三歲的他，跟已故股壇教父李福兆一同創立遠東交易所，是第二把交椅，
代入《大時代》裏的角色，應該相等於劉松仁飾演的股神方進新。神劇其中一
幕，講股民炒神仙股「世界天線」炒到如癡如醉，方進新見散戶齊齊發癲，慨
歎道：「咁垃圾嘅公司都可以上市？」斷定股市即將大冧。
王啓銘：貪心高追最危險！
縱橫股壇五十多年，累積了以億計財富的王啟銘，同樣經歷過多個股市巨浪，
悟出股市「必勝」之道，一字戒之在「貪」。眼見如今股癲人狂，他有風雨欲
來之感，再三叮囑散戶不要貪心，「咁講對得住太公，絕冇私心，我喺股壇從
來冇蝕過本！」
滾滾長江東逝水，所謂大時代，不過是一種選擇，股市從來願者上釣，「好公
道，冇人迫你買，貪心高追先危險，股市有周期，無危機感，死咗都唔知咩事
！」
首選不敗大藍籌
善於睇市的他，對升跌循環有一套看法。「Market rise in greed，drop in
fear（股市因貪婪而上升，因恐懼而下跌），最得人驚係個個都驚，趕住散貨
。好似戲院散場，一個跟一個推門出去實冇事，個個趕住走，你推我我推你就
實出事，所以千祈唔好多人買邊隻就跟去買。」
相對港股，他更擔心內地。「內地好多人唔識股票，隻隻新股都買，仲要借錢
買，好危險。Ａ股現時有啲似七三年股災前，恒指一千七百點嘅情景！」港股
當年由高峰一千七百七十四點，狂瀉至最低位一百五十點，跌幅高達九成一，
有股民輸身家精神失常入青山，甚至跳樓自殺。
一如大多數謹慎理財的高手，王啟銘認為最重要先立於不敗之地，揀股首選大
藍籌。「我唔使睇住個市，揸嘅全部係藍籌股，好似長和（0001）、新地
（0016）、滙豐（0005）、恒生（0011）、港燈（0006）、中電（0002）同煤
氣（0003），唔夠十隻，有息收唔會輸得去邊。」
當年港交所（0388）上市，他持有三個經紀牌，分得二百多萬股，他開玩笑說
︰「有個好朋友話睇七蚊，我咪放咗一百萬股，真係害死我，哈哈！若持有至
今，真係不得了，有幾億元！」那港交所這隻藍籌股是否買得過？他不置可否︰「市盈率六十幾
倍，仲有隻七○○（騰訊）都成五十倍，即係要等五、六十年先賺錢，總之市
盈率多過十倍，都要小心！」王啟銘稱好愛香港股票，皆因不用繳付股息稅扣利得稅。他喜歡比較股票的市
盈率和派息率，尤其鍾情藍籌股，細價股則少炒為妙，「入到恒指成分股不會
差得去邊，有專人挑選先可入，用呢三個標準揀股，you can't be too wrong
！」
作為李福兆的幕後軍師，王啟銘在行內地位崇高，人緣甚好，校長曾稱讚他是
「不可多得的人才」，他卻選擇大隱隱於市，多年來謝絕傳媒訪問，怕的是槍
打出頭鳥，跟好友李福兆一直活在鎂光燈下，恰恰相反。
顛覆傳統
一九六九年，王啟銘跟李福兆等十一個人創立遠東交易所，初時營運非常困難
。「最初冇乜把握，點知反應非常好！好多人妒忌我哋，覺得班後生仔搞搞震
。其實講學歷，我哋比佢哋好，莫應基（前香港會主席）只係皇仁書院畢業。
」
遠東會的創立，不但打破戰後香港會壟斷港股的格局，李王二人更「顛覆」了
不少傳統，例如用粵語進行交易、容許多名出市員出市，又破例接納女性會員
。「香港會沿用舊系統運作，七、八十歲都要走出去寫黑板，再返落去覆盤同
遞飛仔，仆親點算！所以我哋容許每名經紀有兩個出市代表，效率快好多，成
交好快超越香港會。」開業第一年，遠東會的成交額已接近三十億，佔港股總成交額近五成，其後更
一口氣趕過香港會，審批新股上市尤其進取，今日的華資巨企長實、新世界
（0017）、新鴻基（0016）、合和（0054），都是因為在遠東會上市集資，才
得以壯大實力。
由於遠東會空前成功，引來不少人想分一杯羹。已故金王胡漢輝七一年創辦金
銀證券交易所，王啟銘憶起一段鮮為人知的往事︰「佢問點解我哋做得佢唔得
，激嬲李福兆，覺得佢趁火打劫。胡係我好朋友，於是我做中間人，三個人去
萬年大廈閣仔食碗粥揸揸手。我同胡漢輝講，你要做『矮仔』，新股我哋會員
拎一百萬股，你拎五十萬股好啦，咁佢實肯啦，遠東幫長江配售上市，香港會
都冇份分股！」
乘着股市癲狂，已故九龍會主席陳普芬等人七二年創辦「九龍證券交易所」。
論規模，另起爐灶的九龍會最小，行內人以「3.1會」謔稱當時情況，意指該會
實力最弱，成交量只及其他交易所的「○點一」。
九龍會由於規模細，上市門檻自然最低，結果炮製了世紀泡沫股「香港天線」
，後來爆煲清盤，大批股民損手，被譏為「香港黐線」，成為七三股災的「經
典」。
是非曲直有公論
火紅的七三年，最少還有四間交易所準備開檔，如陳日新的「亞洲證券交易所
」以及海外信託銀行董事張明添的「國際交易所」等，結果港英政府要緊急頒
布法例叫停。「一個彈丸之地有四間交易所，從來未試過，英國專員召見我哋
，我哋唔怕競爭，同佢講搵到個地方，咪四間一齊做囉。」
八六年，四會合併成香港聯合交易所，李福兆獲選為第一屆主席，王啟銘擔任
副主席，是他們人生最風光的時刻。豈料翌年十月十九日全球爆發股災，李福
兆宣布聯交所停市四日，股市重開後，恒指狂瀉超過三成三，他受盡千夫所指
。
說起這段往事，王啟銘忍不住替好友平反︰「停市唔係李福兆一個人意思，我
哋開過董事會，決定停市四日，實情唔係怕股市跌，當時股市是Ｔ＋１廿四小
時交收，英國經紀賣咗貨冇貨交，香港咪好危險！停市係為咗清晒交收，等重
新開市唔會出現混亂，當時經紀唔掂，銀行都唔掂！」
看得通股市，卻避不過政治。八八年，李福兆被廉署控以貪污罪，指他在國泰
航空上市時收受股票，其後再追控王啟銘等人收取十二家上市公司的利益，但
眾人最後罪名均不成立。不少股壇中人至今仍然深信事件是政治陰謀，港英政
府一心想打壓華資經紀。
「我又冇拎人股票，又冇賺過錢，咁都有罪？」王啟銘的辦公室仍掛着一張無
罪釋放後的大合照，下方有八個大字：「是非曲直，自有公平」。
詹培忠：「最緊要識落車！」
股壇奇才輩出，七十一歲的詹培忠是另一個炒股天才。他的經歷從不平凡，奮
鬥心強，死不認輸，廿五歲開始涉足金融業，四十六年來炒股無數，人生大起
大落。
他的股市必勝法離不開四個字：「唔輸咪贏」，看似廢話，其實有大智慧，「
想唔輸就要緊貼市場變化，自己睇住形勢上車落車，輸得起就賭大啲，輸唔起
就企埋一邊！」
近日散戶個個「盲俠」上身，靠耳仔聽貼士瘋炒細價股，做過金牌莊家的詹培
忠說：「細細粒好易食，最緊要係跟得貼。你睇隻736，個莊一向衰，炒落唔炒
上，點之畀佢埋到南車，由八毫子炒高幾倍！間公司個名改得好，叫『中國置
業投資』，一早想食大茶飯！」
明年三月大跌市
不過，詹培忠提醒股民要識得落車，他相信股市十年一大厄。八七股災十年後
爆發金融風暴，九七過後，他認為下一個大跌市應該在○七年，結果幾乎全中
。「由於中國經濟太強，美國做唔到嘢，所以硬是拖了一年，直至雷曼兄弟自
行清盤。」
他估計下一個大跌市將在明年三月後發生，「不用預告，只要美國一話加息，
就全部會死晒。」至於為何不是一七年而是一六年？他指是術數的推論。
叱咤股壇近半世紀，詹培忠的炒股之路要從七三股災前說起。當時香港正值股
票熱，升斗市民「寧要股票，不要鈔票」，他做細價股莊家，炒過金松製衣、
利獲家、菲立斯礦務等神仙股。「菲立斯是李福兆喺菲律賓爭取過來，每股從
四毫升到兩蚊，好多人追，之後跌到一仆一碌，累好多人輸錢，佢因此畀人打
過一拳。」
其後股災爆發，他形容與他一樣倖存的「缸」湖中人為「死剩種」，「注定以
後都唔會死，因為老兵唔怕強烈炮火，只怕子彈呢類濕碎嘢。」他當年沒有輸
身家，只是將之前所賺的過百萬元全部輸掉了，「嗰時得廿幾歲，怕乜？」
八十年代初，詹培忠因為將另一隻神仙股佳寧炒穿天花板，因而贏得「金牌莊
家」美名。至八二年，香港因為前途問題面對信心危機，戴卓爾夫人在人民大
會堂前一跌，令恒指持續插水，至年底跌剩六百七十六點，佳寧的神話亦宣告
破滅。
詹培忠慨嘆，佳寧的倒閉既是大時代的結果，也是根基不穩所致。「滙豐當時
樂意借錢畀佳寧，但證監專員霍禮義不接受，一定要將佳寧清盤，因為英國想
推冧香港經濟，既然決定要離開，點解要益你？佳寧規模大，自然不能放過，
不過都要怪佢根基不穩，否則就算英國想推都推唔冧。」
他指佳寧的業務太多，卻沒有實力，壯大原因跟現今不少狂升的神仙股一樣，
全憑財技。「佢只係將金門大廈，即今日嘅美國銀行中心注入上市公司。財技
呢樣嘢，成者為王敗者為寇，事後證明佳寧是失敗的。」
佳寧害我雞毛鴨血
股民以為詹培忠是佳寧的大贏家，只有他點滴在心頭，「外人以為我靠佳寧發
大達，其實佢害到我雞毛鴨血！」原來佳寧清盤時，詹培忠原為債權人之一，
但老闆陳松青拒絕還錢，至今仍欠着那四千萬元，「我只是一個經紀，賺得幾
多錢？所以他唔還錢對我影響相當大。」
八二年，詹培忠向王德輝、陳廷驊買入新時代，成為他第一間正式入主的上市
公司。佳寧出事後，他將新時代的股票按了救陳，至於箇中原因，他不願多提
：「你知George（陳松青洋名）份人，成日『哎』我幫手……講都無意思，人
哋都未必啱聽。」
收購新時代後，詹培忠開始「公司醫生」的股壇第二春，救活過的殼股不下二
十隻。他自詡最叻在「垃圾堆」中尋寶，「買間公司番來見到有衰嘢，別人驚
但我從來唔驚，好簡單，將衰嘢撇走咪得囉﹗」
他指當時的殼股總會有點資產，「最低限度都有個舖位，唔似現在嘅高科技公
司只有『空氣』。有資產嘅話，如果股價係兩毫，通常都會升到一蚊，所以我
一股供十股，每股兩毫的話可以再炒到一、兩蚊，到價就賣，甚至每股送一股
窩輪。」
因為炒殼股，詹培忠自爆跟前聯交所行政總裁袁天凡結下梁子。當年他將手上
偉益的股票一拆四，每股送一股窩輪，怎料四日後被叫停，交易所不批准此行
動，他惟有花數百萬將所有股份購回。「點可以咁㗎？所以我同Francis（袁洋
名）講，我就去選立法會，畀我選中睇你點死！」結果他真的當選了，袁天凡
亦於同年辭職。
張天生：咪玩衍生工具！
入行近六十年的香港證券業協會永遠名譽會長張天生，他的股市必勝法是戒炒
衍生工具，○八海嘯不少散戶買雷曼迷債和股票掛鈎票據而中招，他自己亦堅
持不幫客戶買牛熊證、窩輪等衍生產品。「窩輪條款由發行商訂，只會蠶食散
戶資金，有幾多人炒輪發達？買完好驚瞓唔着，賠了健康，為咩？」
他勸散戶別太貪心借盡孖展炒股，尤其是內地股市，很多人不熟悉亂炒一通。
回想七三股災，他猶有餘悸，「當年炒得好瘋狂，合和出現假股票，要講數收
場。新世界七二年兩蚊上市，曾升到十蚊，之後市跌，人踩人出貨，好易思想
混亂，影響投資判斷。」
大時代裏，股神葉天跟方展博說了一句話：「一個人要成功，首先要搵到自己
嘅世界先可以將潛質天份發揮到最高境界。」張天生十七歲來港搵食，最初在
上環街市旁的水果檔「劈香蕉」，每天凌晨四時上班。有日果檔老闆陳伯跟他
說：「你劈蕉咁叻，唔賣生果真係浪費！」他聽後悲從中來，「返屋企對住阿
媽喊，覺得成世人劈蕉咪好大鑊？於是即刻返夜校學打字。」
創經紀穿出市背心
其後朋友介紹張天生加入證券行，由學報價做起，六九年被新鴻基挖角。他曾
經在金銀會教新人出市場，蔡太蔡陳葆心亦是他的學生，「蔡太當年細粒又肥
騰騰，好難逼到出去寫黑板，收市之後個個成身粉筆灰，佢冇，哈哈！」原來
經紀出市的背心是來自張天生的建議，最初期是金銀的橙色黑字款，「點知畀
人話似蟹，唔好意頭！又話前後都有號碼似監犯，最後到聯交所時統一用紅底
金字背心。」
見盡股壇光怪陸離的張天生，親睹不少人因炒股而富貴，亦有人破產收場。上
周《大時代》講林保怡飾演的滔滔和丁蟹對賭，最後破產收場，現實中其實出
現過不少次。「有人會對賭，我明知佢買貨，就質低個價，銀行借孖展按每日
收市價計算，所以入貨嘅人通常要托高個價，但大莊會不停質你，逼銀行斬你
倉，同劇情一樣。」
七三至今股市大事
1973年香港股市史上最大股災，恒指一年內大跌超過九成。
1984年香港回歸中國出現信心危機。
1987年紐約華爾街引發全球股災，港股停市四日。
1997年亞洲金融風暴，港府入市捍衛聯繫匯率。
2000年科網股狂潮
2003年沙士及通縮，恒指從高位回落五成半。
2007年港股直通車，恒指創下三萬二千萬歷史新高。
2008年美國次按危機引發金融海嘯。
2010年歐洲爆發債務危機
2014年滬港通開車
李明治純屬巧合
跟詹培忠有「牙齒印」的金融圈猛人，還有股壇一代梟雄、前聯合集團（0373
）主席李明治。九一年，詹培忠當選金融服務界立法會議員，這個議席原本是李福兆爭取得來
，假若校長沒有入獄，大概會由他或他信任的人擔任，「否則點輪到我坐？應
該由年紀大些、輩份高些的人做。」
詹培忠當選後，向當時的港督衛奕信和財政司麥高樂投訴，指證監會對股價升
一、兩成的公司查根究底，但對股價下跌近九成的公司卻無動於衷。二人聽後
大為緊張，即追問詹培忠是何公司。
「我諗死喇，最後我舉出六、七隻股票，全部係李明治嘅公司。點知政府真係
即時派三百個警員去查李明治，詳情就係咁，我並非故意針對佢㗎！」
詹培忠做到『唔輸咪贏』咪長勝，緊貼個市，輸唔就企埋一邊！
張天生別玩衍生工具！買完驚到瞓唔着，為咩？
張華峰：「輸兩成好走人 」！
立法會金融服務界議員張華峰七二年入行，由寫黑板報價做起，四年後轉做出
市代表，人工八百元。
每日對住股票，他漸漸悟出自己的炒股心法，找到屬於自己的世界，必勝法是
懂得止蝕，「散戶要緊記，止蝕位是自己可承受風險嘅極限，一般蝕兩成就要
走人，唔好輸三、四成先走。」
小股民愛磨爛蓆，張華峰卻賣仔不摸頭，「沽咗升番都唔會再睇，成日不停精
神鬥爭，好影響判斷。」唯獨港交所，他說不論升跌都不會賣，「成世人喺股
市浮沉，喺交易所學到好多嘢，好有感情。」
七十年代的遠東會設有股票參觀室，與交易大堂有玻璃相隔，稱為「金魚缸」
，股民插針難下。有傳為令散戶冷靜，張華峰打響消防鐘出動消防員「驅散人
群」，非常有型。記者向他求證，他尷尬道出另一版本：「當時剛出市，被遠
東會罰，自己百厭先打響個鐘，後來老行尊董偉有幫我講情！」
撰文：李淑賢，黃俐燕 攝影：攝影組 資料：鄭俊祺 設計：美術組