政改左右港股 港人想太多 周顯
1 :
GS(14)@2015-06-17 10:40:12http://www.mpfinance.com/htm/fin ... mnist/en30_en30.htm
【明報專訊】如無意外，政改今天應該在立法會表決，也是如無意外，政改應該會被否決。問題在於，政改否決對於港股的影響會有多大呢？又或者，不如調轉來說，假如上帝再行神蹟，政改居然通過了，股市會不會像某些人所說的，直上三萬點呢？
我的答案是﹕政改通不通過，同港股有乜關係？唔通會影響到六行四保、三大石油公司、三大電訊公司咩！大家都識得講，港股已經A股化啦，唔通政改又會影響到A股升跌咩！唔講呢。
唉！今日的香港，已經被吃掉了，乜大家仲未知道呢個事實咩？政改能不能通過，這是只有香港人才關心的問題，其他人才不管呢！
幾億買一兩票 挑戰人類智力
近來好多新聞，都是挑戰人類的智力，我指的是，挑戰人類的弱智程度。我記得，在上星期，我先同文友陳凱文及渾水笑說，畀議員一億元或三億元，去投反對票，你估阿爺傻咩！
要政改通過，並不是欠一票半票，用高價買通他們這一票，政改還是無法通過，豈不是飲雪水？我說，除非是民主黨或公民黨，綑綁投票，一被買通就通過了，那就可能十億八億，甚至更多都有可能畀，陳偉業同梁國雄兩條友，阿爺畀錢都通過唔到啦，有無可能咁蠢呀？你們可以說共產黨很壞，但他們怎樣也不是蠢才吧？
跟又在電視上看到梁家傑，說他的黨友有自由意志投票，我笑到幾乎噴飯！一個政黨，你估聯誼會咩，有party discipline嘛，如果政黨不可以要黨員依黨決定去投票，尤其是這樣重大的政治決定，都可以自由意志去投，這個政黨是食……咩！究竟梁家傑知唔知自己講緊乜？
[周顯 投資二三事]