📖 ZKIZ Archives

印度學生 左丁山

2011-10-22  AD

上個月與基金 A在君悅吃午飯，曾經向佢請教：「點解印度裔、南亞裔行政人員在美國做得好成功，花旗、麥肯錫、百事可樂嘅行政總裁都係印度裔，德意志銀行聯席行政總裁亦 係印度裔，在華爾街大行佔高位者更不在少數，但係華裔做大公司總裁，好似一個都冇啫！」基金 A承認：「印度人有幾樣優點，醒目、識講古、英文好到極、數口精、對數字數據背誦如流，好容易在大公司表現出眾，上位快。我自問唔算水皮，但在大型會議上 做演述（ presentation），的確同印度人差一皮，佢地個個都係財經演員，上咗台就好似辛康納利上身，我地華人唔知點解，硬係比較木訥，唔識得七情上 面！」
印度人英文叻，乃英國殖民地傳統使然（不過叻香港太多噃），印度學生將來會在全世界競爭上，係中國學生（香港人包括在內）最大勁敵。前幾日 睇 IHT，有一段報導話印度現有十二億人（因無一孩政策，人口將會多過中國），年齡少於三十歲者佔人口多數，即係話學生人數多得驚人，印度大學應付不了，爭 入大學打崩頭，向隅者眾，於是以前只有富翁家庭先至送子女到外國讀書，現在中產家庭亦被迫送子女到外國留學，益晒美國啲名牌大學。印度首都德里大學成立於 1902年，以香港中文大學方式成立，最初只有三間老牌書院，現在已有七十七間書院， 2010年 TES（泰晤士報教育）排名榜列三百七十一，排名雖低，但入學競爭激烈到極，高中累積分數達到 94.5嘅，都無緣入學，咁去邊度好呢？嗱，美國長春藤大學係最佳後備，達茅夫學院即刻收呢啲 94分、 93分嘅學生，俾埋獎學金㖭，一位女生入唔到德里大學，但可以入芝加哥大學讀經濟學噃，係唔係塞翁失馬呢？
如此一來，大量印度精英學子流往美國名 牌大學，令美國公司流晒口水，白宮嘅就業委員會（好多委員係大公司總裁）竟然建議在美國攻讀工程、科學、科技、數學嘅學生，一畢業就可以攞綠卡，引誘佢地 留在美國！讀英文系、經濟系等等呢？對唔住，唔該你地返鄉下！以後香港學生在美國讀書砌贏美國仔女唔難，想贏印度學生呀，難有把握！

PermaLink: https://articles.zkiz.com/?id=28841
Next Page
ZKIZ Archives @ 2019