ZKIZ Archives


殺牛又殺熊 左丁山

2011-10-28  AD

涂國彬婚宴之夜,左丁山與股評名家鄭家驊講股市走勢,實在難以預測,暴升暴跌,買乜股都死,散戶可以沽空,但 難度甚高,而沽空被挾倉,死得仲慘。家驊話最近佢睇股市交易數據,偶有心得,就係牛熊證街貨聚在一邊嘅話,大市往往反其道而行之,譬如眾人睇淡,羣起買熊 證,於是熊證街貨遠多於牛證街貨,此事一旦發生,大市就會暴升,令大量熊證強制收回(俗稱打靶),相反地,若大量牛證街貨出現,大市就會大跌,大舉屠牛。 家驊話連日來,每次都係咁,唔通真係如有雷同,實屬巧合?
一個星期之後(十月二十三日)蘋果財經版以大篇幅報導「破解牛熊證三大陷阱」,談及「牛 熊證街貨量與恒指成反比」,談及相反理論之準繩,連發行商也嘖嘖稱奇,既然咁準,究竟原因何在?左丁山唔係諾貝爾經濟學獎得主仙士教授,唔識得從眾多數據 之中,找出「因果」關係,難以作答,不少人用圖表顯示兩三種數據走勢,走勢同時向上,或同時向下,或一種向上,二種向下,於是得出呢三種數據有「正相 關」、「負相關」嘅結論,但「相關」( correlation)並不等於「因果」( causality),如果從陰謀論出發,咬定「大戶」、「莊家」睇定嚟食,熊證多就殺熊,牛證多就殺牛嘅話,答案好容易搵到,但港股指數因受國企股股價 影響,本地「大戶」、「莊家」並無指揮恒指大權,恒指往往受隔夜美股,當日滬深股嘅走勢帶動,換言之,往往外圍升港股升,外圍跌港股跌,輪不到「本地大 戶」憑殺牛殺熊之主觀意願將恒指舞上舞落。事實上,近幾個月全球股市備受歐洲債務危機主導,歐洲消息日日不同,大戶即使消息比我哋靈通,亦唔見得佔咗好大 優勢,否則嘅話,對冲基金 Perry Capital駛乜在香港扯白旗投降,執笠關門而去?美國沽神保爾森駛乜輸到面青?其實今年大部份投資者都唔敢買入股票,最多只係「有嘅不賣,新嘅不 買」,平日就一於乾炒恒指期貨與牛熊證,賭大市上落而已,故此現貨市場成交甚少。德國堅持要希臘債券持有人四折收數,歐洲金融機構會蒙受大損失必想盡辦法 集資,此乃利淡消息也。

PermaLink: https://articles.zkiz.com/?id=28837

Next Page

ZKIZ Archives @ 2019