中環在線：張朝陽用公司錢撐股價 李華華
2008-10-28 AppleDaily
內地IT行業過寒冬，偏偏搜狐主席張朝陽（圖）早前大唱反調，話覺得「春意盎然」。呢幾日佢再蒲頭繼續牙擦，話係時候執平貨，噚日仲宣佈搜狐嘅購物大行動，買邊家公司？對佢嚟講最有價值嘅公司梗係搜狐。
搜狐趁平回購
搜 狐公佈第三季業績，賺4000幾萬美金，比舊年同期多咗倍幾。表現咁好，張朝陽話預咗，因為之前受惠京奧。佢仲話o依家收購價錢好，又有錢喺手，家陣唔買 等幾時！據新民網講，張朝陽早幾日喺胡潤百富企業家高峯會上同傳媒講：「雖然全球化金融危機令一啲企業舉步維艱，但對搜狐嚟講係一個機遇。」不過，佢暫時 嘅目標係自己──搜狐。據搜狐IT報道，搜狐會揼1.5億美金（約12億港銀）回購，張朝陽話，呢個大計表明管理層對公司發展前景有信心，而且把握到美股 波動好機會，提高股東價值。凡事睇兩面，搜狐上周五股價收報44.7美金，由半年內高位91蚊跌咗五成；今次回購，可以話係想畀人知佢哋大把cash，撐 住股價同股東信心。