睇吓鮮：FB教主去哪兒
1 :
GS(14)@2014-10-27 23:41:35
外資想打入強國，潛規則係先做朋友，後傾生意。FB教主朱克伯格上星期喺北京示範咗點同大陸同胞add friend。由2008年開始，社交網站facebook喺內地被禁，期間內地嘅社交網絡微博、微信急速冒起。FB教主並未放棄進入中國市場，上星期訪問清華大學，喺30分鐘嘅問答環節，全程用普通話，贏得師生同網民「讚好」。有網民留言話：「朱克伯格講普通話，比我說英文還好。」咁FB教主有私人普通話老師、美籍華裔太太Priscilla Chan悉心指導四年，唔係臨急抱佛腳。而朱克伯格對中國文化嘅認識，都唔會好例牌話「I love Jackie Chan」或者李小龍，而係霍元甲。至於Instagram有關香港雨傘運動嘅相畀內地禁咗，就避開冇提。今次FB教主衝破語言障礙，但更重要係突破內地網絡封鎖。佢係被喻為「中國MIT」嘅清華大學經管學院顧問，可吸納畢業生入公司，意味FB唔會引入外部勢力跟同胞爭飯碗，並話今年已請咗20位中國畢業生，下年仲會請更多。FB亦要同科網同業有良好互動。即使FB被中國封鎖，亦積極為內地企業同世界聯系，例如協助聯想（992）搵外國客。佢又透露同雷軍食飯，讚強國企業夠創新。朱克伯格為咗要喺強國「打卡」，展示唔少軟實力，但要阿爺首肯畀FB登陸，睇黎短期唔能夠成事，仍要等多陣。
C+B本欄逢周一刊出
來源:
http://hk.apple.nextmedia.com/financeestate/art/20141027/18913614