📖 ZKIZ Archives

TVB有絕招 左丁山

http://hk.apple.nextmedia.com/template/apple_sub/art_main.php?&iss_id=20111006&sec_id=12187389&art_id=15678063&cat_id=255&coln_id=22

昨講在凱旋廳睇日本短途馬錦標賽直播，可能惹人誤會，因為上星期日馬會只在晚上直播法國賽事，地方係五樓吉澳吧，凱旋廳日間係無開電視播馬嘅，但是日適逢老友測量 L在凱旋廳訂咗一間房，房內就可以開電視睇亞視國際台直播啦。
講 開亞視，咁多年來未試過強勢，真可憐，近月又受到誤播江澤民死訊嘅後遺症困擾，連一向有唔錯口碑嘅新聞部都要收招牌，士氣大受打擊，以後如何經營下去呢？ 香港地好奇，第二啲蝕本生意一定冇人做，但傳媒即使虧損連年，仍然有不少大老闆願意接手蝕落去，都唔知為乜，但知道一定唔係為錢。
電視台難賺錢， 主因係 TVB一台獨大，幾十年來擁有鐵打一般的慣性收視率，不少師奶在家睇開 TVB，一定唔俾仔女、老公轉台。「蘋果日報」報道最近有「維基短訊」，吸引不少無綫台前幕後人物轉工，測量 L有個親戚 Y嘅同學在無綫工作，親戚 Y睇完蘋果嘅「維基短訊」立即 app佢：「維基有冇搵你過檔？」同學即時回應：「收唔到維基短訊咪好冇面？辭咗職嘞！」
睇嚟「維基短訊」幾收 效，有人肯過檔噃。測量 L以懷疑嘅語氣問：「維基掂唔掂㗎？轉工會唔會變成失業？」哦，王維基素來有辦法，叫人轉工，唔會累人失業啩？但電視呢行的確難做，難於在無綫有一絕招對 付新對手或者舊對手嘅創意，就係：「你做乜，我做乜」，你有一個 A節目收得咩，我做十個 A節目，一於頂爛市，自有慣性收視支持我，令你不得逞，直至喪氣為止。外國電視或者不屑為之，無綫電視卻樂此不疲。王維基有冇新計仔應付 TVB二仔底死跟呢？
有此原因，過去無綫的紅人轉工轉台後，即使係最佳編劇、編導，仍然一籌莫展，不能為新僱主帶來高收視率，故此親戚 Y之同學轉工，未必可以燒炮仗。香港免費電視嘅觀眾最鍾意睇肥皂劇，而呢類節目最難有特殊表現，令到人地做唔到嘅。 TVB走咗好多好手又如何？慳番唔少成本㖭，六嬸掩住嘴笑！

PermaLink: https://articles.zkiz.com/?id=28232
Next Page
ZKIZ Archives @ 2019