職場慧眼： 鬱在心裏口難開
1 :
GS(14)@2013-02-11 16:55:05http://hk.apple.nextmedia.com/financeestate/art/20130206/18158113
「最近愛上了妳的文章，睇完『點同老闆開口好』，我有個問題想請教妳，我轉咗另一條team，要睇多一個產品，比之前的工作量多了很多，我應否向我新老闆提出加薪的要求？因為我覺得好難開口！現已轉team3個月了……」
你問我「應否」，叫我點答你好？答應或否都是點你，我怎知你的工作實況？而且工作量多了不一定會有人工加，你看銀行各大小機構「精簡」人手，有得留低的同事，肯定要做埋其他「被減省」了的同事的工作，之不過肯定不會有人工加。轉了team睇多一個產品是一個挑戰，是展示你的能力的好機會，亦是測試你究竟有幾多斤兩？是否應付得來。而且做多了和做好了是兩回事，三個月下來你做出了些甚麼成績足以證明你的實力？
如果你覺得真的被搵笨了，為甚麼不理直氣壯向新老闆提出要求？為甚麼覺得難開口？如果自己的權益你都不敢站出來為自己爭取，誰幫得了你？相反，如果條件牙力都不夠不自量力強出頭，被新老闆抽後腳查找到不足，分分鐘自找麻煩自取其辱。
轉team也好轉工也好，道理其實一樣，就是轉之前必須和新老闆有共識，雙方各自有甚麼期望要求事前問清講楚，光明正大先小人後君子，何必吞吞吐吐？要不然像我就來個二話不說藝高人膽大，做到成績擺在老闆面前，看他是否識做論功行賞。這個做法很多打工仔會覺得很蝕底，萬一老闆詐傻扮懵側側膊唔識做，豈不白做？此種思想可謂短淺冇大志，累積經驗打響名堂，為自己打造一張亮麗的成績表，何愁沒有出路？毋須谷氣講多洩氣，懲罰過橋抽板無良僱主的最佳方法，就是頭也不回跳槽去，睇佢點死！
張慧敏