好不主席：紙板主席
1 :
GS(14)@2012-08-31 11:14:30http://hk.apple.nextmedia.com/financeestate/art/20120831/18004540
經常往返內地各省市出差，除與當地官員打交道，有時亦會學嚇一班問責高官落區做騷，表面是視察業務，體察民情，實情是藉機釋出美意，與當地同事聯誼打成一片，促進中港兩地交流融合，務實執行並配合特區政府「大融合」、「大團結」的施政方針。
不過今次出差情況有點不同，皆因此行其中一個目的，就係為以我肖像為本的人樣紙板進行揭幕……應該係「開光」儀式。無錯，今鋪真係名副其實的「紙板主席」。整鬼你囉！一到七月十四，就要親手將自己實物原大的人樣紙板公然示眾，往後仲要預見「分身」被不知幾多嘅內地同事「觀」「摸」影相，差在未燒香膜拜，否則真係大吉利是，救苦救難觀世音菩薩……（下刪百字誦經）。
鋁板警察 啱曬中聯辦
其實係咪被內地市務負責人整蠱就唔知，因為都係佢哋力主要將吉祥物，即係我，安放各地營業處。不過聽聞內地員工普遍對「主席」這身份的人好生尊敬，甚至視之為神靈，怪不知唔少二三線縣市司機，都愛將毛像擺在車頭以保平安。不過觀乎啲內地同事見到我都真係興奮莫名，搞到我好似明星咁飄飄然，所以不管此風俗看似愚昧，亦要順應民意。
返到香港，無獨有偶，赫然驚覺香港警方亦趁盂蘭佳節推出全新升呢版的「鋁板警察」，輪流放置喺高速公路旁邊，以阻嚇飆車一族及減少交通意外。遠睇的確唔多覺其真假，但係就有司機七情上面咁扮曬「好驚好驚」，然後話自己一啲都唔擔心，仲話放得幾日自然會識穿。
此招裝假狗的成效如何，有待驗證。但警察就話慳水慳力，好有成本效益云云。每塊「鋁板警察」造價成本僅5000蚊，若然能夠長期使用，確係慳返唔少警力。之不過，慳咗的警力去咗邊呢？唔通就係用來阻住啲人表達民意，又或者周之無日就去「恐」學民思潮那班小朋友？查實最應該擺呢啲造假警察嘅地方應該係中聯辦，因為無論示威者點行，裡面的人都唔會出來，擺咁多真人警察都係浪費公帑。仲有如果冇咁多「不必要」嘅警力，示威者肯定冇咁情緒激動，對鄰近街坊影響都會少啲。
其實，每次喺電視見到一班問責官員經常巧言令色，弄虛作假，每次面對傳媒都是答咗等於無答，話做唔做，一味亂噏卸膊吞泡。反正都是虛應，與其浪費納稅人的金錢，一年使幾千萬養班問責官員，不如整番副真人大小的「紙板問責官員」出嚟，一套12個，擺喺政府總部入面，任影唔走，任問唔答，任笑唔嬲，服務態度熱誠親切，相信必定對民望回升有幫助。請注意，此批紙板高官的造價只需要6萬蚊。
盧先亞