中門大開：人人告急 提早棄保
1 :
GS(14)@2012-08-21 15:44:00http://hk.apple.nextmedia.com/financeestate/art/20120821/16622036
根據港大最新民調，民建聯各區排首名之候選人支持度急跌，曾鈺成在港島由19%急跌至6%，其他陳鑑林、譚耀宗及蔣麗芸分別跌咗6至10個百分點，形勢告急。兩次調查中間有乜建制派大醜聞發生？冇乜，最大新聞係阿牛保釣插旗成功，民族主義高漲。
建制民調急跌 不符常理
我認為保釣運動反而係對建制派有利，因為始終與愛國主義有關，先天上民族主義昂揚，對親中人士有利。而選情發展至今，火花全無，建制派也一早與振英切割，堆足了沙包，無論國民教育、7.1上街、「膠波」誠信危機等，建制派全數閃開，防火牆早就做好。加上在比例代表制設計下，根本候選人唔可能隻揪，好似單議席單票制，泛民親中尖銳對決，而係名單大混戰，根本冇人有興趣睇選舉論壇。
橫睇掂睇，都唔明為何民建聯候選人民望急跌？除咗抽樣偏差，亦有人懷疑下達了動員令，支持者在民調中策略性全面收口改口，製造泛民穩坐釣魚船，建制派告急之危機，以此做期望管理，但我認為機會不大。當然建制派實力也一直冇完全在民調反映，因為老人票眾多，此等老人票未必會在民調中表態，加上內地港人回港投票，也不會反映在民調之中。
曾鈺成政治形象正面，冇大政治爭議及表錯態，點會無厘頭由19%跌到去6%，喂，大佬呀，梁振英醜聞一次又一次，都未曾試過支持度咁樣急速下跌，所以對不符常識常理的民調，要小心閱讀。
變相互殘殺 賽果或意外
呢次選舉之關鍵最多來回十席，就係分區直選新增五席，最終落入邊派手上，議席越多，最終所需當選票數越少，即係尾二同包尾當選者，可能只係差幾百至數千票。因此兩大陣營也人人告急，意圖將自己陣營不同山頭之選票，集中到自己名單之上。曾鈺成告急，最大受害者並非陳淑莊，而係葉劉、劉健儀及黨友鍾樹根，在棄保效應下，隨時吸走黨友或建制派友好選票，出現意外賽果。
添馬男