2011-9-29 NM
由王維基統領的CTI城市電訊，近日瘋狂向無綫搶人，觸發一班多年被公司打壓的低薪員工逃亡潮。為壯大聲勢，王 維基集中火力撬走無綫一線藝人，據知，佘詩曼、鄧萃雯、林保怡、陳鍵鋒、馬德鐘已經講掂數以天價過檔。銀彈 攻勢雖然有效，只可惜，無綫大部分一線小生花旦均被長約綁死，想走都難。重點挖角
由於明年本港會增加三間免費電視台，「一哥」無綫電視難再獨領風騷。近日，城市電訊創辦人兼主席王維基便 向無綫高調宣戰，展開連串挖角行動，向藝人打主意外，更成功撬走大班幕後製作人員，已落實轉會的編劇、編審、監製多達五十人。日前，王維基公告從無綫挖走三十一名編劇和編審，以及逾二十名監製及導演，這班幕後精英，過去曾製作多部高收視劇集，包括李添勝監製的《巾幗梟雄》、唐基明監製的《怒火街頭》、黃偉聲監製的《學警狙擊》以及劉家豪監製的《溏心風暴》。重創對手核心製作班底，王維基還暗諷無綫管理不善：「我見三十二個人，三十一個人話走，你諗吓係乜嘢士氣？」說話相當氣燄。成功打散無綫幕後陣營，但要打響開台頭炮，王維基更加要落足彈藥，招攬無綫的當家小生花旦。為表誠意，他親自聯絡挖角藝人，再相約面談過檔條件，據知，三個月前他已鎖定目標，向一姐佘詩曼埋手。「雖然阿佘同無綫簽咗三部部頭約，依家只拍咗一部，但王維基都唔介意，因為佢有收視保證，能夠有阿佘坐鎮，等同剃咗無綫半條眼眉，依家阿佘經理人Tina，已經去咗CTI經理人部門返工。其實王維基都有打無綫經理人部門主意，因為班經理人手上有客又有藝員，所以佢出到多無綫一倍人工撬人。」知情者說。
無福消受
在無綫拍劇，阿佘每集薪酬約兩萬，王維基卻以八倍價錢斟她過檔，相比要山長水遠返大陸賺人仔，能夠在香港拍劇也有同等待遇，令阿佘亦為之心動。其實以阿佘為首離巢過檔CTI的無綫藝人，還有林保怡、馬德鐘、湯盈盈、姚子羚、伍詠薇、周家怡等，不過，野心不小的王維基希望再下一城，連日繼續搶攻，落力向快將約滿，以及正式約滿的鄧萃雯、陳鍵鋒入手。「鄧萃雯同陳鍵鋒近期長駐內地拍劇，講求效率嘅王維基就親自飛上大陸搵佢哋傾，除咗錢，佢開嘅條件比無綫寬鬆，簽約有彈性，可以逐個劇簽，務求成功搶人！」一名內部員工說。不過一切亦非易事，皆因無綫大部分一線藝人，均被長約綁死。「無綫人工奀，班小生姐仔騷錢個個得幾千蚊，最大收入係靠廣告、出席活動，最慘係無綫為咗控制成本，開廠拍劇要喺指定時間完工，○三收工，○七就要開工，連瞓覺都無時間。好似胡杏兒咁，最近就買咗部七人車出外景，一有時間就匿上車瞓，個個只係敢同朋友呻，依家有機會，點會唔想走？但家陣班一線全部由新人做起，仲有五年八年約在手，唔可以話走就走，幾多錢都無福消受。」知情者說。
方姐下旨 CTI開火宣戰，身為無綫揸弗人的方逸華，近日下旨要高層收拾爛攤子。「方姐講到明，係人都要留，留得一個得一個，仲即時調任陳志雲睇番經理人部門，同李寶安、梁乃鵬一齊穩定軍心。本身睇開經理人部門嘅樂易玲，更加被點名要收拾殘局，因為之前王喜、馬浚偉開炮鬧佢無誠意傾約，搞到要陳總親自出馬，先搞得掂。」綠葉有得揀 唔單只前線藝員成為挖角目標，一班多年來在無綫受到冷待，做到一肚氣的綠葉，趁住難逢一閏的電視台大戰，集體逃亡。在第二輪挖角潮中，王維基主攻一班老戲骨，包括岳華、駱應鈞、姜大偉、元華、黃淑儀及馬海倫等。這班元老級藝人在無綫人工奀又不被重視，銀彈攻勢加埋親自約見誠意牌，的確易於令這班做到一肚氣的綠葉心動。無綫實施節流政策，更向一眾綠葉開刀，要他們接受一年一騷或者一年六騷的待遇。因為騷價只有三至四千元，除非不斷獲派工作做到爆騷，否則年薪就只得幾千至兩萬，早前炮轟公司，才獲續約的李國麟，公開指無綫係難民營，演員食唔飽、著唔暖。
做定功課 為了一擊即中，據知王維基以過百萬年薪利誘「綠葉王」駱應鈞、艾威、郭鋒等人轉會，即使在無綫當大茄多年的陳榮峻，都被開出年薪五十萬的過檔條件，待遇差天共地。「就算同班甘草傾過檔，王維基事前都會做功課，佢見陳榮峻，竟然可以講番《怒火街頭》嗰幕監獄戲，仲記低網民對陳榮峻嘅好評；甚至唔使班綠葉四圍走，將份合約速遞去佢哋屋企，相比無綫嗰種愛理不理態度，淨係尊重兩個字，都贏晒。」知情者說。
白手興家 王維基（Ricky），現年49歲，1985年畢業於香港中文大學電子工程學系，同年加入IBM電腦公司，從事香港市場推廣及分銷電腦產品，89年移民加拿大，92年回流香港成立「香港城市電訊」，經營廉價回撥式長途電話業務，打破當時「香港電訊」的長途電話壟斷局面。97年城市電訊（1137）於香港聯合交易所掛牌上市，王維基擔任公司主席，兩年後城市電訊再於美國Nasdaq（納斯達克）指數掛牌上市。同年王維基成立香港寬頻，之後出任亞洲電視行政總裁，上任12日對外宣布離職，並改任亞視顧問。
唔易走
王維基大灑金錢搶人，但無綫一眾阿哥阿姐，大都有幾年合約綁身，想走都難，不過，王仍未罷休，他致電仍有 合約的藝人時坦言，表示可以「先簽約、後過檔」，就算要等多三、四年先甩約轉會，都無問題。
鬧爆 無綫刻薄藝人不算新鮮事，只是昔日一台獨大，個個為保飯碗敢怒不敢言，隨着免費電視台加入，加上國內的娛樂事業發展蓬勃，藝人啞忍多年的怒火猶如計時炸彈，一觸即發。陶大宇有指陳志雲碌人情咭，力邀昔日有收視保證的藝人回巢，曾與無綫有合約糾紛的陶大宇表示：「點秤無綫俾錢都唔會高過出面。」
馬國明無綫出現挖角潮，「有排」都未滿約的馬國明，對於外闖搵真銀恨到出口：「好想返內地拍劇，內地劇薪 酬好，間中拍一部都好。」
林保怡率先與無綫斬纜，唔做親生仔，連藝員合約亦拒簽。「其實真係要諗吓點樣對自己好啲，先去做一個決定
，做得唔開心咪走囉！」
李國麟效力無綫廿年，滿約後無綫不聞不問，李國麟破口大罵：「喺呢度，好似置身埃塞俄比亞難民營一樣。」 馬浚偉效力十八年，主演劇集高收，無綫當冇件事，令他有意提前解約，「我今次真係死心。」 陳鍵鋒在無綫十二年，但並非親生仔，無緣被力捧，去年唔再續約，接受有線訪問時大吐苦水，「剩係有得提名
男配角，好似當我甘草咁……到上年（2010年）連提名都冇！」、「叫我上去傾，一去到就隊張約俾我去簽……好似《婦女新姿》（《都市閒情》）煮晒咁，整定俾我簽。」
馬德鐘合作十八年，決定不再續約，馬太化名「江你」在微博代夫炮轟TVB：「這種顛倒生活和源源不絕的應酬
，鐵人都死！」、「這公司不顧員工休息，好冇人性，只有像福島核反應堆才可將它化解。」