樂香園：羅范河蟹中電？
1 :
GS(14)@2012-08-16 11:34:26http://hk.apple.nextmedia.com/financeestate/art/20120816/16608622
中電（002）舊年業績畀海外業務拖累搞到大倒退，不過，由於晨早經已自爆消毒，仲維持派息，所以公佈完業績，股價依然靚仔。有一樣嘢市場估唔到，就係中電對新政府嘅態度，喺短短六個月，居然嚟個翻天覆地嘅大變。
原本電王、即係中電大股東米高嘉道理，喺今年3月個陣，白紙黑字狂轟港府唔負責任，唔同市民解釋點解要加咁多電費，有人更理解為「兇」特區政府。殊不知前日主席突然轉口，自插中電都有責任，仲好期待同政府密切溝通添，好似去完小桃園大和解咁。
有人話，應該係因為新政府櫈都未坐暖，中電驚又「兇」人會弄巧反拙，希望出年中期檢討時，大家傾得暢順啲。亦有可能喺中電畀面「重出江湖」的新任獨立非執董、「大話英」政府嘅心腹羅范椒芬，嚟個先禮後兵，話唔定日後有事要靠羅范幫拖呢？
其實中電唔使太擔心吖，一來佢有羅范呢個護身符，二來負責傾電費嘅環境局局長黃錦星，之前上電台連利潤管制協議的准許回報幾多都唔識答，海迪唔知大話英喺用咩準則請呢條友。真係好難想像，佢點樣同兩個電霸傾加少啲電費！
海迪