中門大開：民生無小事 問你死未
1 :
GS(14)@2012-08-07 12:18:17http://hk.apple.nextmedia.com/financeestate/art/20120807/16581370
特首休假暫避熱廚房，休假前接受訪問，一貫廢話連篇，滿口陳腔濫調。越睇佢越似羅家英演技，用好很誠懇嘅表情、聲線同態度，講出一堆廢話空話， Bullshit一番。睇怕佢真係家英哥 fans，似足《國產零零漆》內之「聞西」，每次出場，均煞有介事地用極之嚴肅語氣介紹極之無聊的殺人武器，問你死未。
廢話連篇內容欠奉
振英掛在口邊四字金句一堆堆，好似「民生無小事」，用過不少次。這是廢話一種，可以變出同類句子，包括：僭建無小事、政治無小事、選舉無小事、愛國無小事、民意無小事諸如此類，這些句子可以用，但只能作為開場白，後邊應該跟住一堆具體政策建議，以作主體內容。但梁振英由競選開始，一直至今掌握實權，都係將序言、引言變成內容，虛話形勢分析一大堆，問題一籮籮，但實質答案欠奉。
虛話廢話只係用來烘托氣氛，係一種語言偽術工程，但就決不能取代實際內容。例如當討論中菲南海衝突，一大堆中美外交戰略形勢分析，乜嘢美國重返亞洲後戰略部署，但最核心問題係「打、定唔打」，就結論欠奉，呢類典型廢噏分析，內地媒體多的是。
本來在老董年代早已充斥呢種虛話浮誇風，人人講咗當做咗，分析形勢一大堆，具體施政一事無成。所以曾蔭權上台時便提出務實主義作為施政新風，得到民意支持，但因社會矛盾擴大，民粹主義被煽動起來，大家放下常識理性，跟從魔笛，竟然相信有一種求變藥，一服之後可以解決民生大小問題。
你信唔信？反正好多香港人就信了。到今日連似模似樣嘅政策討論，諸如退休保障、標準工時都不曾展開，所謂新政，就只是沿用曾朝派糖。呢劑香港人大有可能遇上了政治寶藥黨了，往後所謂新政，只有「民生無小事」呢類空話廢話，問你死未？
添馬男