請大象 添馬男
1 :
GS(14)@2012-07-30 14:37:37http://thehousenews.com/politics/%E8%AB%8B%E5%A4%A7%E8%B1%A1/
唉！見到三十幾度仲要抱住小朋友去遊行，自問：「點解要折騰香港人！」
早已寫過胡主席「不折騰」金石良言，但睇嚟都好難實現，今後香港只有不斷折騰。一切根源於特首選舉打開了 Pandora's Box，三低當選特首早已政治基礎不穩，若果懂得形勢凶險，全力踢穩守突擊，睇準機會打反擊，相信大家都會好過啲。
結果第一步未上場就派急先鋒羅范搶攻五司十四局重組，令建制派政黨飽受毓民拉布戰折騰，心中有氣，加上選舉裂痕仍未補，最後衰在建制分裂之手，真係開壞個頭。到6月底振英僭建醜聞曝光，旋即陷入誠信危機，7.1遊行上街人數已破了近年紀錄，這是一個特大警號，但他竟視若無睹。
7月2日佢夥拍吳克儉落屯門做地區 Show，就係遇上學民思潮學生抗議，場面一片混亂。正路就唔應該再主動搞地區 Show，俾人笑總好過俾人砌，但新政府唔知點解，全線出擊，新局長朝朝早去電台 Talk Show任主持人砌，以前從未發生過。理論上，親民係好事，但全部要建基於策略及時機，從未有弱勢政府會主動挑起爭議，畀機會對方狂砌。
數萬家長上街 摑林鄭一巴
一班雜牌軍拼湊而成問責班子，不少欠缺從政歷練，也無核心管治綱領，出邊個、死邊個，但神奇之處是仍然以為自己強勢，可以打搶攻，結果有眼見。幾萬個家長學生為單一議題上街，係好嚴重之事件，林鄭死拗話國民教育推出有社會支持，今次明顯係摑了佢一巴，仲摑到應一應。
但做香港人也真係幾慘情，未來五年不斷要上街請隻大象（主流意見）出嚟畀振英班子睇，頻頻晒冷，遲早會一次大爆發！
添馬男