📖 ZKIZ Archives

奀星爭俾入場費　新城有錢有獎

1 : GS(14)@2010-12-30 22:32:01

http://www.inv168.com/phpBB3/vie ... b47b849d67#p1487483

官恩娜與 MC Jin雖然不是大公司旗下歌手，照樣用錢議獎。

一向本住「人人有獎攞」宗旨的《新城勁爆頒獎禮》，今個星期三（十二月二十九日）舉行，今年分發的獎項多達一百二十個，除咗一班當紅歌手可以滿載而歸，三、四線「奀星」同樣有份排隊上台「分豬肉」。
據了解，早於半年前開始，新城已與各大唱片公司及歌手進行「交易」，歌手設有入場「最低消費」十萬，只要在限期前擺低「入場費」作來年廣告宣傳費用，頒獎禮當晚，就可以上台攞獎。

量多取勝

今年新人幾乎冇一個表現突出，但頒獎禮當晚亦個個有份攞獎。

○○年起，新城開始開倉派獎，其後獎項數目年年遞增，去年更一共頒發一百四十六個獎，破晒紀錄。既然玩量多取勝，各大唱片公司為旗下歌手搶得就搶，於大半年前，已開始與新城「傾數」。
「啲歌手同唱片公司，早喺大半年前已經開始搵新城啲 PR傾出年啲廣告費，佢哋嘅指引係最少十萬蚊，到數嘅頒獎禮嗰晚就會有獎攞。嗰十萬蚊主要包括播歌費、頒獎禮嗰晚本場刊，同安排啲歌手上節目訪問等等。」一名唱片公司人員透露。

有錢有獎
有錢就有獎，一眾三、四線「奀星」難得有機會上台，亦心甘情願掟錢落廣告換獎。
「今年之內有派台歌嘅歌手，唔理紅定唔紅，有冇人識，都可以同佢哋傾。好似今年班新人，鄭家維、朱紫嬈、鍾一憲、連詩雅、糖兄妹，個個都有得上台；新人獎又分跳舞新人、搖滾新人，淨係頒新人獎，都起碼要二十分鐘啦，仲有啲三、四線好似戴夢夢、狄易達、 Hotcha、官恩娜、阮民安、方珈悠……全部肯俾錢就有獎。」


戴夢夢（右二）將會連同一班師妹替新城演出音樂劇，所以即使新歌冇人識亦一樣有獎。


阮民安（ Tommy，右）自資出碟，雖然銷量麻麻，早前他亦嘗試在新城落廣告換獎，但最後傾唔掂數。


近年絕跡其餘三台頒獎禮的狄易達，年年在「新城」都有獎攞。

限期交數
「奀星」個個有份，一班當紅歌手更加坐定粒六，攞獎攞到手軟，各大唱片公司亦相當識做，爭相競投包起黃金時段播歌位，幫旗下歌手谷播放率。
「通常唱片公司都會安排旗下歌手幫新城做吓啲商業騷，包起晒黃金時段啲播歌位，新城啲 DJ一向播歌都有份名單跟住嚟播，唔係佢哋自己揀歌。仲有，佢哋仲規定廣告費要喺今年十一月之前俾晒，俾咗錢嘅先有偈傾，同賣位一樣，仲有得講價，試過有歌手由十萬講到六萬。」知情者說。


一向被批評公信力欠奉的《勁爆頒獎禮》早前舉行記者會，除了古巨基、謝安琪屬一線，其餘大部分都是三、四線歌手，場面冷清。




八月舉行的《新城國語力頒獎禮》，又開倉大派 106個獎，單是陳奕迅已獨攬六個大獎成大贏家。


新城每年都會搵當紅如阿 Sa級別的歌手演出商業性音樂會，從而得到大量廣告商贊助，帶來可觀收入。

好過無

歌手們無論有冇碼頭都好，為咗有份上台分「豬肉」，都自動獻身跟新城傾合作條件。

公信唔值錢
鍾意瘋狂分豬肉嘅《新城頒獎禮》，得獎名單皆令人質疑，歷年亦多次傳出收錢播歌、換獎等傳聞，公信力欠奉。

張學友炮轟︰影響樂壇發展！

98年，新城推出 Power Pick，即收錢播歌，由唱片公司出錢包下時段替旗下歌手谷播放率，從而影響頒獎禮結果，當時張學友炮轟：「掟錢播歌，影響樂壇健康發展！」同年，學友在新城頒獎禮僅得一個獎。

金牌杯葛

07年，金牌拒絕讓旗下歌手出席新城商業性音樂會，導致新城在頒獎禮上將原本頒給古巨基的男歌手大獎改頒給李克勤，其後金牌聲言杯葛新城。

---