婚外情傳聞女粉絲傷心中環在線：鄧聲興轉工冲喜 李華華
2008-10-23 AppleDaily
雖 則話經濟差咗，搵工跳槽冇咁易，但似乎對財圈股評人冇乜影響。近排股評人開始玩新一輪嘅音樂椅遊戲，10月頭，股評界型男郭思治就高調開party返新 工，由平和證券過檔耀才；最近，中環金融圈就傳出靚仔股評人鄧聲興（Kenny）亦都跳槽，華華梗要第一時間打電話畀當事人，問清楚傳聞堅定流？結果── 消息屬實！
唔再紙上談兵
Kenny喺電話度向華華證實咗佢會轉工，咁究竟過檔邊間公司呢？Kenny話暫時唔方便透露，因為 仲搞緊牌照問題，要遲吓先可以向外公佈喎。不過，佢都同華華露咗少少口風，話嚟緊嘅新工作，唔單止會睇實研究部，仲負責埋資產管理，即係發揮嘅機會多啲咁 話。Kenny喺東泰證券打咗8、9年工，喺研究部打骰，主要做公司分析，畀投資意見，咁畀意見幾時都容易過自己做嘅。家吓佢份新工要掂埋資產管理，可以 落手落腳炒埋一份，即係話，佢唔再係紙上談兵，直頭上埋前線作戰。
自己落手投資
股市o依家通街都係平貨，除咗睇你有冇膽識 買，都要睇吓有冇眼光，咁講到公司分析，以Kenny喺研究部做咗咁多年，可謂駕輕就熟。之不過，家陣人心不穩，隨時一個壞消息傳出，市場就哄一聲散貨， 完全唔理基本因素，所以今次對Kenny嚟講，都係一個挑戰。早幾個月前鄧聲興傳出婚外情，俾周刊影到佢背住老婆，同一位財經女公關拍拖，搞到乖仔形象蕩 然無存，傷透唔少師奶女粉絲嘅心。家吓佢轉工跳槽，絕對係冲喜，正所謂舊嘅唔去，新嘅點會嚟呢？至於仲會唔會有股評人起身？下一個輪到邊個？大家估吓啦！ 李華華
[email protected]