紐約市長彭博發出警告，美國如不能創造新職位，降低失業率，有暴動可能，語音未落，已有青年人到華爾街紮營，抗議銀行證券商毀壞、控制經濟。美國當務之急 就是增加就業職位，故此奧巴馬連「環保總統」形象都不顧了，暫時撤消美國環保署關於降低排放的指令，以免企業增加減排成本，請少啲工人。但另一方面，美國 啲法令好奇怪，民主黨控制眾議院時通過嘅 Dodd-Frank法案，內有所謂 Volcker Rule，即是禁止美資銀行以自己資本進行炒賣交易（ proprietary trading），因是之故，高盛已經終止咗呢類交易，多餘人手自不然清理出門。外國銀行又如何呢？監管當局從嚴解釋 Volcker Rule，所有外資銀行在美國經營 proprietary trading一概不准，如外資銀行在境外聘用美國僱員做有關交易，一樣唔得。咁就多餘啦，外資銀行咪在倫敦、法蘭克福做囉，一個美國人都唔聘用，有乜唔 得呀！呢類規條，對提高美國失業率，好有貢獻，美國一方面要增加就業，另方面要趕走外國僱主，實在矛盾之極。你估外資銀行不在紐約搞交易就會天跌下來咩！
外 資搬走，點都會影響若干就業，呢日收到日本國際協力銀行（ JBIC）通知信， JBIC（前身日本進出口銀行）自一九九五年以來，一直以香港為基地，服務地區覆蓋香港、南中國、澳門、台灣。呢個香港辦公室於九月三十日關閉，服務轉往 北京辦事處，另外在新加坡有辦事處，負責東南亞及台灣業務。唔，任何外資銀行辦事處搬離香港，都唔係好消息， JBIC香港雖然規模細，本地僱員不多，但倘若日本機構有樣學樣，將中國業務搬上北京，東南亞及台灣業務設於新加坡，香港唔多盞啫噃。我地目前最大困難係 甲級商廈供應極少，租金不斷上升，外資在香港設立辦事處，成本係貴啲嘅，外資機構人員嘅子弟，要入本港國際學校更加異常困難，令外資人員大為頭痛。凡此種 種，皆與「供應制約」（ supply constraints）有關，特區政府唔好以為香港失業率低至 3.4%，就覺得彭博之言不適用於香港呀！