講膠所手記：李小加 畀條路大家行吓啦！
1 :
GS(14)@2012-02-24 22:20:21http://www.sharpdaily.hk/article/index/15307/20120224/58486
今時今日做香港人，一句講晒，無奈！
日日睇選特首新聞，候選嗰兩件，隻豬就日日擘大眼講大話無腰骨無膊頭，隻狼亦唔好得去邊，只係咁啱啲醜嘢唔及隻豬Juicy搶唔到乜嘢新聞版面，但兩個都順利入閘，做緊嗰件仲衰，毫無操守舔晒着數仲話大家嘈得唔啱，我等平民除咗上街嘈，只有無奈！
就算唔講咁高層次揀領導人，淨係講搵餐晏仔，香港人好多時都因為啲無厘頭、一意孤行嘅政策而極度無奈！好似港交所（388）延遲交易時間單嘢咁，第一階段實施到家陣，事實擺在眼前，甚麼同內地股市接軌、帶動交投更活躍，無囉！但嗰堆中小型華資證券行就淒涼，燈油火臘皮費重咗，生意又唔見得多咗，李小加咁搞法等於要佢哋快啲「安心上路」！
咁信又遞過、願又請過喇，仲可以點？香港證券及期貨專業總會話，嚟緊星期日（26號）會開始絕食行動，第二日就會再向港交所遞請願信。李小加，畀條生路大家行吓，可以嘛？
YY