📖 ZKIZ Archives

業績簡評 - 永旺 (0984.HK) PARTIPRAL 派得好

http://partipral-hk.blogspot.com/2011/08/0984hk_24.html




































永旺剛公佈今年度上半年業績, 營業額32.4億比上年度同期增加大約6%, 但明顯睇到有好大分別既係收入來源分佈. 舊年香港永旺生意16.8億佔整體收入約55%, 大陸永旺生意13.8億則佔45%; 而今年, 來自大陸永旺既營業額已經達到17.6億, 佔整體收入跳升至54%, 內地業務亦係歷來首次超越香港.

今期業績顯示本地業務不論收入抑或利潤都係繼續倒退中, 而且因為市場飽和未來亦不見得有太大改善空間, 基本上已再次印證此分部不能再寄予希望. 未來永旺既發展重點仍然會係大陸 - 分部營業額同比增長近6成, 就算同去年下半年比較, 營業額&利潤亦增長20%以上, 表現算相當出色. 正如初次分析時所講, 依家既永旺已經係半隻甚至以上既內地百貨公司, 而今期業績正正係業務轉型一大註腳.

展望未來, 管理層亦表現得相當樂觀:

"受到強勁經濟增長及增加個人所得稅免 稅額帶動，中國本地消費預期將會繼續強勁，這趨勢令管理層對華南的零售市場前景感到樂觀。有見廣州消費者的可支配收入大幅上升，加上 AEON 及JUSCO 品牌在當地聲譽日隆並廣受歡迎，本集團於未來 18 個月內將在廣州開設六家新店，藉此加強據點及把握不斷湧現的龐大商機。為加快擴展華南地區的零售網絡，本集團現正積極洽談其他開店計劃，並會在適當時候再 作公布。"


建立好品牌先再加快開店速度, 雖然會導致增長力放慢, 但相對上亦算係穩中有進.

上半年業績稅後賺2.2億但其實當中有8千幾萬水份. 除稅前賺3.1億扣除物業公平值上升實賺2.2億, 以稅25%計, 半年純利應該大約為1.66億, 即每股約賺$0.64. 派中期息$0.255, 出手稍低因為以往都係保持50%派息率. 估值方面, 全年賺$1.28, 派息$0.64 - 現價$18.1市盈率14倍, 息率3.5%, 若以內地百貨業平均估值作比較肯定算係幾平.

近日市況欠穩, 業績差既公司固然要洗倉, 但業績好既亦唔代表唔駛跌. 個人黎講係好滿意永旺呢半年表現, 但由於早前已發盈喜, 或許佳績早在市場預期之內, 若然明日可以大跌, 自己甚有興趣增持.

PermaLink: https://articles.zkiz.com/?id=27236
Next Page
ZKIZ Archives @ 2019