📖 ZKIZ Archives

能吏誤國 左丁山

http://hk.apple.nextmedia.com/template/apple_sub/art_main.php?&iss_id=20110817&sec_id=12187389&art_id=15530401&cat_id=255&coln_id=22

餐飲Ｍ以前係賓架，大財務公司總裁，出入有司機接送，退休後開間舖頭賣歐洲食品材料，以橄欖油、葡萄酒為主，當初係得閒得滯，開間舖頭過吓日神啫，點知做 吓做吓，生意居然逐漸壯大，遠遠超過佢嘅預期。究其原因有二，一來香港人逐漸接受西班牙、地中海食物，開始習慣吃健康食品，二來中環啲西餐廳數目不斷增 加，生意幾好，餐飲Ｍ嘅客源有增無減。
不過桐油埕始終裝桐油，呢日飲茶時，佢慨嘆曰：「我賣 AIG股票時，最高價賣過一百零五美元，打銀行工，買美國股票，一定有三大金融藍籌，就係 AIG、 Citi與美銀，點估得到有朝一日，呢三隻股會搞到焦頭爛額，跌到四腳朝天㗎。嗱，你畀七十美金我，我可以代你買齊呢三隻股！」查吓股價，呢日 AIG收市報 23.13美元， Citi報 29.85美元，美銀報 7.19美元，各買一股嘅話，只需 60.17美元，要記住，餐飲Ｍ以一百零五美元賣一股 AIG之時， AIG股份仲未二十合一，調整番之後，今日 AIG嘅股價相等於 1.1565美元而已，無怪餐飲Ｍ唏噓不已。
AIG之衰落，現在翻查歷史，係在前主席漢．格連保（ Hank Greenberg）被迫辭職之後。 2005年三月， AIG董事會受到紐約州檢察官史必茲嘅壓力，逼格連保辭職鬆人，為乜事呢，史必茲有政治野心，要建立一個打老虎人民英雄之威名，專搵大公司開刀，威脅控告 佢地以虛假交易，串謀詐騙股東， AIG係受調查對象， AIG頂唔住壓力，趕走八十餘歲嘅老人家主席格連保，之後 AIG就一改保守作風，大大增加高風險結構性工具交易，卒之在 2008年金融海嘯時一鋪輸清，要聯邦政府打救，如格連保仍然掌舵嘅話，以佢嘅保守作風，凡事過問嘅作風， AIG不致發生咁嘅事。「華爾街日報」在八月三號報導，美國第二巡迴上訴法院判四位 General Reinsurance行政人員無罪，而史必茲就係利用呢單案件牽連及逼走格連保嘅。打官司打咗六、七年，格連保已年近九十，史必茲從檢察官憑人民英雄形 象爬上紐約州長寶座（後因召妓被迫辭職），在佢向上爬嘅過程中，直接間接害死咗 AIG，令美國政府傾全力救市，唔怪得古人有云能吏衰過庸官。

PermaLink: https://articles.zkiz.com/?id=27075
Next Page
ZKIZ Archives @ 2019