中環在線：中原、美聯大陸齊收縮 李華華
2008-10-17 AppleDaily
自從中央舊年中加強調控，內地代理業已經陸續收縮甚至倒閉。加上最近嘅金融海嘯，更加係雪上加霜，各大代理行喺內地嘅規模都會再縮。
一 直喺中國市場做得唔錯嘅中原中國，最近進行全國性精簡人手，好似北京、上海、深圳同天津等，短期內都要cut一兩成人手同分行數目。佢哋華東區阿頭陸成 講，上海生意上半年都唔錯，但啱啱嗰3個月就要見紅，所以8月份開始準備瘦身，o依家諗住首階段到今個月底，將人手同分行減少成半，分別剩番約2700人 同160間，之後睇定啲再算。
另一個管華南區嘅阿頭賴國強話，舊年中已經開始做嘢，基本上過去一年暫時都有錢賺。因應今次海嘯，年底前深圳人手同分行會再減一成，分別剩2800人同140間；廣州就減一兩成，分別剩2000人同130間。
深圳人手分行削一成
根據資料，中原中國o依家喺內地大約800間分行、萬五個代理。佢哋舵手施永青話：「做到咪繼續做，做唔到咪壽終正寢囉。」
至於美聯集團（1200）同香港置業，都會收緊內地人手同分行，聽講短期內要削兩成。