|
||||||
|
日本人賣馬，比 澳洲神奇百萬拍賣會更有程序，更有層次，準買家有大把時間將每匹馬觀察。兩日賣三百八十隻，每日一百九十，逐匹馬在草地站立近二十分鐘，圍繞大草地行一個 圈，然後每批五匹在拍賣場外行圈等候入內，內裏又有一個沙圈，有四隻馬不斷踱步，拍賣場門口就有兩隻站立，買家有大把時間將隻心儀周歲馬睇到夠，事先又可 以要求睇隻馬嘅腳部X光片以及喉嚨探測片，滿意嘞先至入場舉手競投。日本人素來做事有充份準備，佢地賣馬前嘅準備工夫令到買家即使入錯貨，都只可怨自己眼 光與運氣不夠，唔會怪拍賣會有意誤導。 在馬房驗馬時，經新加坡練馬師P介紹，認識一位馬來西亞人叫做阿Sam，此君在日本牧馬場工作十五 年，能說流利日文與英文。問阿Sam：「點解啲日本周歲馬咁馴，絕少亂跳亂動，日本馬競賽時入閘，好似操兵咁，三十秒鐘就可以全部十八隻馬入晒閘，但香港 馬往往在閘前發脾氣、撞閘、衝閘，搞成三四分鐘都未入晒閘？」阿Sam答：「日本人認為細路仔嘅儀態、禮貌，係在幼稚園學習嘅，唔係到入咗大學先至教。我 地在日本教馬，兩歲前就要教manners，帶隻馬入一間細到好似閘咁細嘅房間，教佢站立，企好就俾佢食草，企到定嘞，就帶隻稚馬入閘，在閘內餵食草，行 為心理學有一個名稱，叫做conditioning，日本牧場一定會在兩歲前就將隻馬condition好，故此兩歲後參加正式比賽，隻隻馬都好乖咁入 閘。」後來見到澳洲獸醫R，問佢澳洲練馬師點樣教新馬入閘，佢答：「英國澳洲紐西蘭都係用cowboy（牛仔）方法，拉新馬入閘，唔肯入就一鞭打落去。日 本人嘅方法係要好有耐性先至得嘅！」唉吔，有此分別，唔怪得阿Sam猛sell左丁山：「嗱，買隻日本新馬（PPG）返去香港試吓，你就知道我地嘅準備工 夫（break-in）做到十足十，到香港三個月後就一定可以出賽！」聽到左丁山心郁郁，立即去查吓運費，唉，從日本運隻馬到香港，運費貴澳洲運港一倍。 |
||||||