2010-02-10 AD
| ||||||
早排國際大鱷索羅斯嚟香港同本地投資者公開對話,刮起一陣旋風,唔知《黑天鵝》作者塔雷伯(Nassim Taleb)係咪同佢心有靈犀,近日竟然攝出嚟狂讚索羅斯係真功夫大師傅,仲夠薑到攞股神畢菲特嚟伴碟,質疑佢只係一世夠運,冇真材實料。 撐索羅斯有料到 塔雷伯話︰「我先唔會嘥時間研究畢菲特,索羅斯勁過佢多多聲,佢可驗證嘅成功例子多股神200萬倍!」佢之後唔知係想兜翻定想踩多腳,竟然話︰「我唔係話畢菲特冇料到,之不過我哋無足夠證據證明佢唔係符碌啫!」嘩!兜得嚟句句有骨,果然係大作家。 論近況又真係索羅斯fit啲,金融海嘯淘盡多少英雄,股神當時瞓身入市,結果水瓜打狗,佢身家唔見咗五分一,得番400億美金;相反索羅斯就明顯技高一籌,貫徹大鱷本色乘風破浪大賺40億美金。 夠膽寸股神,當然非泛泛之輩,塔雷伯憑大作《黑天鵝》名利雙收,佢話金融海嘯就好似黑天鵝咁絕無僅有,只能靠撞彩見到,事先無法預見。我華華唔係質疑佢,但若果索羅斯真係有二百幾萬個成功例子,咁佢就算每日執行百幾單交易,都要成70幾年喎! 李華華 [email protected] |