|
||||||
|
有「富豪飯堂」之稱的福臨門，今年踏入六十周年，本應可喜可賀，但一份簡單不過的廣告，卻揭露兩名親兄弟老闆不咬弦，身為董事總經理的細佬徐維均，直言兄弟二人現已「見面無偈傾」，更揚言手握撒手鐧，「爆出嚟，佢兩父子都會無晒面！」 這場溏心風暴，看來一觸即發。 上月初，福臨門在報紙刊登廣告，通知顧客酒樓將於大除夕及年初一歲晚收爐，還以「董事總經理徐維均聯同徐德耀、徐淑敏」的名義，表示福臨門創辦六十周年，感激各界鼎力支持。 這 則表面看似普通不過的廣告出街後，隨即在名人富豪圈引起非議。原因福臨門多年以來，都由徐沛鈞（五哥）及徐維均（七哥）兩兄弟合力打理，因此廣告絕不尋 常。據一名福臨門熟客表示，「只係寫咗七哥同佢對仔女嘅名，五哥就不知所終，仲以為五哥賣咗盤俾細佬添。」事件發生後，有熟悉五哥徐沛鈞的夥計透露：「五 哥看見份廣告後好谷氣，覺得老七好唔俾面佢。」 兩兄弟股權均等 由徐福全創立的福臨門，向來歸第二房的男丁五哥和七哥經營，他們股權一直平分春色，每人各佔四成半股權，其餘一成股權，則由同父異母的四名姊妹持有。五哥一向手握財政及鎮守灣仔總店，七哥則負責廚房出品、採購入貨及打理尖沙咀分店，可算是「一文一武」的拍檔。 據熟悉他們兩兄弟的人透露，七哥不是讀書材料，自小便輟學跟父親徐福全揸鑊鏟從低做起，經常到郭得勝、包玉剛及許愛周等富豪的家中做筵席到會。由於徐福全名字有「福」，又做到會生意，於是取名為「福臨門」。 今時今日福臨門演變為富豪御用飯堂，該人士指七哥認為自己功勞最大，相反五哥則在外邊打工做會計，直至福臨門七十年代轉型做門市後，才辭工回來睇數：「可能有人覺得冇咗佢唔得，因此講嘢都大聲啲。」 日本另起爐灶 九○年代初，七哥更衝出香港，私下在日本找當地拍檔搞福臨門分店，「好多人都唔知道，日本福臨門只有七哥份，但老五覺得細佬總算係幫祖業發揚光大，於是隻眼開隻眼閉，任由細佬以家族品牌向外發展。」 但 受了教訓，五哥亦學懂保障自己權益，一早以香港福臨門的名義，在國內註冊了「福臨門」的使用權。至○四年，七哥又想飛甩五哥，和郭鶴年在上海香格里拉酒店 搞福臨門分店，一查之下，才知五哥早有部署，惟有答應將上海分店賺到的某個百分比盈利，上繳給香港總店，上海店才得以順利開張，然而此舉已令兩兄弟關係緊 張起來。 由於兩兄弟經常在業務發展上有爭拗，去年福臨門董事會終進行改組，由兩人對恃的局面，改為大家派遣兩名董事，再加一名親妹，形成七人董事局方便決策，七哥更兼任做董事總經理，統籌香港與九龍兩店的日常運作。 夥計變磨心 性格火爆的七哥，上位後變本加厲，除了不時鬧夥計外，還與熟客「過招」。其兒子徐德耀，四年前在英國讀大學時曾參加慈善籌款，並有找福臨門的富豪熟客贊助，據悉長期幫襯的劉鑾雄最闊綽，二話不說便贊助了一萬英鎊，聖誕樹大王高長昌亦贊助了不少。 徐德耀畢業後，去年底應承父親徐維均回港繼承祖業。今年初高長昌在福臨門食飯時遇上徐德耀，恃熟賣熟講笑說「有份贊助你讀書」，豈料這番說話被七哥知道後，令他氣上心頭，更遷怒於夥計，要求他們「唔好太就客，否則就炒魷」，頓令一班老臣子成為磨心。 其中在福臨門工作三十多年的樓面經理陳錦年首當其衝，由於經常被七哥責罵，終在一月底抵受唔住「自願」離職，「啲客個個都係有錢佬，一年閒閒哋俾幾十萬生意我哋做，梗係要服侍周到啦！我唔覺得自己有問題，我都未見過啲咁唔講道理嘅老闆。」陳錦年指公司尚欠他十多萬元花紅，因此不願多說箇中詳情。陳錦年離職後，七哥即任命兒子徐德耀接替其工作。 據悉，陳錦年是五哥於三十年前，從其他酒樓挖角回來，一直是五哥的左右手，因此今次老臣子離去，令他兩兄弟又再爭執起來。惟既成事實，五哥亦無心戀棧，公司開會也鮮有露面，往往在灣仔福臨門食罷中午飯後便走人。 「見面無偈傾！」 記者上週六到福臨門，向七哥徐維均求證是否兄弟不和，他唏噓地說：「講唔上係反目，只不過而家見面無偈好傾。」 他接着繼續解釋：「我哋舊時為咗營商理念唔同，都爭拗咗幾十年，好多人都知。但而家我係董事總經理，佢（五哥）只係管數，本來各司其職，我管理夥計有我一套，我鬧完又有人去讚佢，班夥計聽得邊個？你話係唔係有唔啱喇？」七哥說時還餘怒未息，邊說邊緊握着拳頭。 七 哥認為兄弟關係變得愈來愈差，全因有人煽風點火，「只有我最清楚福臨門的傳統運作，五哥被人蒙蔽咗，只係信幾個夥計。靠夥計咪會兵變囉，好似先父當年，就 曾經俾班大廚及酒樓經理另起爐灶，撬走過半客人。」親身經歷過這次兵變的七哥，因而不會盡信員工，更揚言「我身為老闆，鬧夥計天經地義」。 兒女聽話肯幫手 怒 火中燒的他，惟有說到兒子才變得寬容：「好彩我個仔肯返嚟主動幫我手，佢本身讀醫，頭腦又精明，仲話返嚟做生意，都冇浪費讀醫嘅經驗。」七哥強調時代已不 同，不可能要兒子像他一樣從頭學起，「但都要識去南北行揀貨，廚房整個流程都要知，等佢儲夠經驗，有成績先介紹俾大家識。」至於他的女兒徐淑敏，則負責管 理日本的四間福臨門分店。 一對聽話子女令他老懷安慰，相反五哥的兒子徐德強，七哥則形容為「唔生性」，竟不顧家族生意出外闖世界，「佢老豆 （五哥）居然話唔使佢返嚟福臨門，話驚佢俾我鬧，仲俾過億德強去投資。」他強調當年進軍日本及上海，一心交棒姪兒接手，但徐德強十年前從美國返港後，一直 搞自己的生意，現時是香港上市的德泰中華投資的主席。由於姪兒不欲落手落腳打理祖業，才逼他自己這房人獨力向外闖，「我可以對得住天地良心。」 「咁點解最近報紙刊登的福臨門廣告，只有你們三父子的名？」記者問。 「段稿我已經寫明『承董事局命』啦，我哋咁多董事，唔通寫晒所有名落去？」七哥激動地說。「如果五哥父子仲搞咁多嘢，我仲有撒手鐧，爆出嚟，佢兩父子都會無晒面！」 五哥心淡 記 者其後再找五哥求證，他透過兒子徐德強，表示不會回應任何有關兄弟不和的事。但據熟悉五哥的人透露，雖然兩兄弟現已面阻阻，但彼此亦沒意欲拆夥，「（五 哥）唔開心梗有啦，不過福臨門係祖業，佢唔想俾人講閒話。」該名人士指五哥早已上岸，投資股票及炒樓更有一手，所以只希望福臨門穩打穩紮發展。 相反被七叔指「唔生性」的徐德強，則強調彼此經營理念不同，他傾向找專業人士回來協助管理，因此不會返福臨門全職幫手，「七叔雖然係董事總經理，但唔代表可以一言堂，有啲嘢我唔同意，咪關埋門喺董事會同佢講喎，我又唔會响夥計面前同佢嘈，有時我都希望佢聽下後輩嘅說話。」 福臨門小史 福臨門原名「福記」，由曾當何東家廚的徐福全創立，專做富豪到會服務，鄭裕彤的淺水灣大屋入伙酒，以及現在每年四叔李兆基在家中舉行的生日喜酒，都是由福臨門包辦。 七十年代福臨門轉型做門市，一直以食鮑魚及魚翅等貴價食材聞名，城中富豪食客不絕，近年最知名食客，要算一星期例必幫襯幾次的劉鑾雄，而李澤楷則愛幫襯東京的分店，因此福臨門才被譽為「富豪飯堂」。 |
||||||