ZKIZ Archives


【唔係鐵係聖衣】星矢30年MV 高登二創聖鬥士:我是打不死的小宇宙

1 : GS(14)@2016-08-09 07:33:04

04年,地下樂隊Libido將星矢日文主題曲前半首,二次創作成為好熱血嘅廣東話版。


有一種Language,叫做星矢。一句「無敵嘅聖衣」,邊個高登仔唔識唱先?撞正動漫《聖鬥士星矢》30周年,今日起銅鑼灣有一比一真人原大嘅聖衣展覽。呢個時候,小編發揮咗小宇宙,搵來兩批對星矢極有影響力嘅人物,世紀合作搞番首MV。有今生,冇來世。04年,香港地下樂隊Libido,將星矢日文主題曲,二次創作成為「無敵嘅聖衣」,更曾登上高登十大膠歌之一。08年,廣州網絡歌手常愚蠢(真名:黃春暉),將後半段再三次創作成為終極版,並且重新演唱,成為網絡間紅透百幾萬hit rate嘅星矢迷必然朝聖之經典歌。但其實,今日出街嘅呢首世紀MV,本來就不會存在……***一個月前,小編知道一比一聖衣會嚟香港展覽,已經萌起撮合呢首世紀合唱嘅念頭,但係人生嘅挫敗同星矢趴低嘅次數一樣咁多,種種原因底下,令呢首歌胎死腹中。直至10日前,件事先有突破性發展,小編終於聯絡得上Libido,我哋用咗10日時間,經歷咗錄歌、8號波、去band房、去荒山野嶺。終於,聖衣如期到港,Times Square答允提供場地拍攝,連身在廣州嘅常愚蠢,亦被大家嘅小宇宙感動咗,自拍片段畀《蘋果》剪輯。呢件事證明,世上係有小宇宙嘅。然後,《蘋果》獨家2016年版《聖鬥士星矢》港中大合唱MV,先至可以面世。呢種叫做乜嘢精神?呢種就係星矢式打不死永不放棄嘅精神,係星矢教曉我哋嘅。10日前,小編諗過放棄,但好在冇。有嘢想做,就要坐言起行;唔郁,就輸一世。***有一種Language,叫做星矢。常愚蠢兄係廣州人,佢喺訪問中同小編講出最激動人心嘅一句︰「粵語係世上最霸氣嘅語言,冇之一。」小編聽到喊咗出嚟。亦因為呢個原因,佢嘅三次創作,堅持用廣東話去作詞,而唔係普通話。對,仲有乜嘢完美得過,一首用廣東話演唱嘅《聖鬥士星矢》?場地︰Times Square鳴謝︰常愚蠢‧射手座;Libido‧處女座攝影︰峰‧雙魚座;Neo‧雙魚座文‧採‧編‧導‧剪︰Roy‧天馬座





認住佢,佢叫阿Ky,就係佢發明咗「無敵嘅聖衣」呢句萬能key,之後先至會出現「無敵嘅結衣」。

08年,輪到佢,廣州網絡歌手常愚蠢,將星矢主題曲尾段再三次創作,網上較為流傳嘅版本,亦係由佢主唱。

燃燒吧!時代廣場星矢30周年展!



靚仔一輝,似女人嘅阿瞬係佢弟弟。呢句歌詞終於有畫面喇!

冰河真係好cool,佢一直企喺度,冇出過聲

各位星矢迷放心,紫龍隻眼醫返好喇!



成日last minute先出現嘅一輝,今次提早出現喇!

今次全賴有樂隊keyboard手Maggie,如果唔係佢及時回覆小編嘅pm,就撮合唔到今次世紀大合唱。更要感謝Maggie幫手混音。





來源: http://hk.apple.nextmedia.com/entertainment/art/20160809/19729218
PermaLink: https://articles.zkiz.com/?id=305127

Next Page

ZKIZ Archives @ 2019