楊健：「由低做，不斷學習」 陳永陸
1 :
GS(14)@2015-10-08 01:39:31http://www.eastweek.my-magazine.me/index.php?aid=46445時代集團（1023）第二代楊健（Andrew），和Tuscan's的楊荊卉（Chloe），將繼續與陸叔暢談延續家族生意之喜樂，以及成功收購「TUSCAN'S」部份地區就零售業務之商標獨家，及可轉讓特許權經營之使用過程。
時代集團傳到第二代，仍然堅持求變的精神。
陸：數一數時代原來發展都超過四十年，Andrew同Chloe你哋係幾時開始返公司幫Daddy（楊華強）手？
健：陸叔，香港經濟自九七金融風暴就開始轉差，九九年唔知點解仲好似差過九七添。原本我喺外面返緊工，咁啱阿叔（楊和輝）想開始睇吓點做供應鏈，同點做真正皮革嘅袋，由於要搵人一齊去學，佢就搵咗我返去公司幫手。
陸：咁你係咪由部門主管開始做起？
健：我係由低做起，要識包裝嘅流程又要識點執板，仲跟阿叔周圍去搵客同見客，總之咩都要識啲就最好，做吓做吓就做到o依家，仲仍然好鍾意返呢份工添，哈哈……
陸：咁Chloe妳係咪同Andrew同樣熱愛做手袋零售，所以先返公司幫手？
卉：你都可以咁講，因為我細個成日陪媽咪行街，潛移默化下好留意時尚嘅嘢，原先我係喺廣告公司做嘅，經常日夜顛倒做到凌晨都幾辛苦，想轉行又唔知想做咩……突然諗到我鍾意潮流嘢，就去紐約Parsons School of Design進修囉。
陸：妳讀完書就返嚟公司Daddy同阿叔手？
卉：仲未o架，我讀完返嚟走咗去做brand先，做咗八、九年先返公司主力搞Tuscan's creation，我都係啱啱返嚟幫手無耐，好彩以前做嘢嘅經驗都幫到我。
陸：講起Tuscan's，我知係來自意大利佛羅倫斯，但點解你哋會揀呢個品牌做嘅？
健：皮具都離唔開歐洲，那時咁啱有個客通知我阿叔話個品牌遇上財困，於是我哋飛咗去同佢哋傾合作，發現大家嘅經營理念好接近，一拍即合就由我哋幫Tuscan's做亞洲市場。
陸：咁你哋又點幫呢個品牌定位？
健：我哋手袋嘅零售價一般係賣千幾到二千幾咁啦，目標客戶主打OL，我哋行中價路線，重點係希望人客可以用較優惠嘅價錢，去買到個造工較好又好配襯嘅產品。
卉：其實呢個品牌都已經有四十年歷史，我哋希望人客會因為用Tuscan's而感到開心，手袋之外我哋亦加入行李箱系列同小件皮具等等，伸延去照顧有唔同需要嘅客戶群。
陸：我知Tuscan's主要零售市場就係中國同香港，有數據顯示中港零售業表現欠佳，你哋又有無受影響呢？
健：我諗luxury brand會受影響多啲，對我哋影響會比較微。大品牌有機會受影響而改變佢哋開鋪嘅策略，我哋變相可能因為咁有機會進駐到大啲同好啲嘅商場。
卉：係呀，我哋做marketing嘅都因為咁得益咗，好似一啲廣告靚位o依家都可以有機會攞，甚至有議價嘅可能添。
與時並進皆因潮流永遠在變
陸：你哋公司未來發展會有咩新方向呢？
健：陸叔，除咗做好o依家嘅業務，Daddy講過時代同潮流永遠都在變，我哋要與時並進，不斷去搵唔同市場定位嘅零售牌子，仲要積極開發更多客源，就好似我打理緊嘅Fashion & Joy咁，以賣行李箱為主，專攻年輕人市場。我哋亦會繼續喺歐美嗰邊搵機會，睇下同其他品牌有咩合作，有機會就開拓同擴闊業務發展空間。
陸：好想問吓你兩位入咗公司之後，Daddy同Uncle佢哋係咪好放手比你哋做？
健：公司嘅業務發展策略係好清晰嘅，大方向我哋會跟定落嘅計劃去做，至於喺細節方面Daddy同Uncle都會好放心交比我哋去做。
卉：我哋公司內部溝通好透明嘅，好少機會有指示混亂嘅情況出現。我哋由一一年開第一間嘅Tuscan's，到o依家中港加埋有八十幾間分店，目前為止Daddy同Uncle都好支持我哋所有員工。
陸：你哋兩位入咗公司又有啲咩難忘嘅事？
健：我記得初初去外國搵客嘅時候，去過唔同地方，有好多唔同嘅新體驗，呢啲比咗唔同嘅學習機會我。
卉：無論大品牌抑或細品牌嘅競爭對手，都總有啲嘢喺佢哋度學到，我覺得有競爭先可能有機會比到我哋。
陸：最後想問吓你覺得Daddy同Uncle有啲咩最值得你哋學呢？
健：我講先啦，我覺得喺佢哋身上可以睇到潮州人嘅特性。佢哋做每件事都會用心去做，而且會時時鼓勵我哋公司年輕嘅員工去多學習、多增值，佢哋成日講如果做任何事都可以發生到感情，成功其實就已經在望o架喇，哈哈。
卉：我就會時時記得佢哋講過做嘢要從多角度去睇，同公司上下嘅同事要時刻保持溝通，唔好怕困難唔好怕競爭，因為生意永遠都有得做，我哋眼光要放遠啲、放大啲，就有機會成功。
TUSCAN'S
地址：尖沙咀美麗華商場一樓1009號