ZKIZ Archives


老少不同 左丁山


2011-4-16  AD




 

從中環乘的士去跑馬地,司機似係一位老翁,但精神爽利,講說話夠大聲,左丁山平時一上的士就閉目養神,不與司機交談,但呢日只係講咗一句:「今日好景噃,交通咁暢順,唔塞車嘅!」老司機就立即跟住上,自爆身世坎坷,滔滔不絕,由中環講到跑馬地,左丁山唯有得個聽字。

司 機猛講中環邊幅地平,邊幅地貴,似乎十分熟悉,左丁山忍唔住問一句:「你點知呀?」老司機話:「我一九四七年來港,做過乞兒仔,老竇係二世祖,將阿爺啲家 產敗晒,一味吸鴉片,賭番攤,包二奶三奶四奶,打完仗就乜都冇晒,捨棄五個仔女不知所終,我冇人家收留,流落街頭做乞兒仔,以麻包袋做衫,捱大自己。今年 七十一歲咯,揸的士四十年,冇放過假一日,我乜都唔信,只係信錢,每晚返到屋企數銀紙,我就好快樂。」左丁山又問:「你有無仔女呀,佢地養你啦!」司機 答:「駛乜佢地養,佢地三個已經大學畢業,好少理我,佢地咁叻,又唔駛我理佢地呢!」

此乃獅子山下故事,講出嚟,啲八十後、九十後梗係又話 out晒嘞,仲講!獅子王寫來電郵叫左丁山睇YouTube,關於一班八十後騷擾黃埔花園百佳,驚動警察一事,此片段幾長吓,可能係班年青人自拍上網嘅, 佢地騷擾之後,到餐廳飲茶,各自對咪表述發言一番,自鳴得意。左丁山睇到悶,聽咗一半就「轉台」。呢班後生仔與上述司機好似來自兩個不同星球,後生仔似係 飽食無憂米,以示威、騷擾他人嚟取得成就感、滿足感,老司機就一世人死做死做。俗語有云,牛耕田、馬食穀,老司機一代死捱,為香港奠定繁榮基石,似足耕 牛,一啲新世代就係馬食穀,唔駛搵米,有時間去策劃示威。示威本是一個學習過程,最怕一啲人不知如何學習,除了嗌口號與靜坐馬路之外,一啲道理都學唔到, 只知跟「大佬」。如果泛民政黨以為可以靠呢類動作爭取民意,明年攞到更多選票嘅話,因住踩中西瓜皮。


PermaLink: https://articles.zkiz.com/?id=24287

Next Page

ZKIZ Archives @ 2019