|
||||||
| 2011-3-15 AD |
||||||
|
交易所於三月七 日開始，延長交易時段，早市由九點半至十二時，午市由一時半至四時，全日交易時間有五小時，比以前多咗一個小時。時間係多咗嘞，但成交額就冇增加，不少本 地經紀與散戶為之怨聲載道，證券業工會領袖W嬲到爆，對住記者亦幾乎講粗口，好彩都係按捺得住，冇在鏡頭前爆粗。好難講嘅，幾十年嘅起床、返工及午飯時 間，突然間要改變，暫時好難適應，如果將來成交額真係因延長交易而增加，有益本地經紀嘅話，相信就會少啲人埋怨，但目前股市由基金主導，假使外地基金因時 間長咗而多入市嘅話，佢哋都係幫襯外國經紀嘅啫，本地證券分唔到一杯羮，怨氣實在難消。 中環酒樓茶室餐廳嘅生意亦受影響，呢日飲茶時份，一點過後，成層樓嘅人客走咗八成，以前好難訂到位嘅餐廳相信在一時十五分以後，會有大把空枱，益咗我哋呢啲「非經紀、非金魚缸客」，起碼訂位容易啲，食得輕鬆啲，但餐廳R就要重新安排過佢屬下餐廳嘅上午「作戰時間」。
賓 架Y負責貸款，與股票交易無關，在茶樓飲茶一樣飲到兩點幾先至埋單，走過去同佢打招呼，順口問：「生意好嗎？」賓架Y答：「好就好嘞，可惜撲存款傷腦筋 啫！」咦，香港銀行唔係水浸嘅咩，同業拆息又低到在一厘以下，使乜為存款擔心？賓架Y話：「你有所不知，最近呢兩個月，啲港元美元存款唔知走咗去邊，唔夠 美元都易明吖，冇港紙就難以解釋，啲同業拆息率咁低，有啲人為因素，金管局唔想扯高，影響聯繫匯率。但同業利率係拆入唔到頭寸嘅，直情係有價無市，如果拆 得到，啲行家使乜用一厘幾嚟吸引定期存款呀。」銀行需求轉緊，借錢又如何？銀團貸款正已進入冷凍期，一般客戶借錢要畀二百點至三百點子以上，即HIBOR + 2，或HIBOR + 3，唔怪得一啲銀行停做H按。左丁山聽到之後，打電話搵外匯G問吓有乜原因，佢話不甚了了，猜想係好多人將存款用另外渠道搬錢入大陸轉做人民幣存款之故。 |
||||||