ZKIZ Archives


撈底股小小補充同修正 PARTIPRAL 派得好

http://partipral-hk.blogspot.com/2011/03/blog-post_19.html

亞倫國際 (0684.HK)

早前都有約略研究過呢隻股, 詳見舊文. 整體來講係一間幾唔錯既公司, 當時股價處$4水平屬歷史新高, 以小型工業股來講7倍P/E唔算好貴, 但5.7%左右既股息率就明顯不甚吸引. 至於後來大升至$4.5以上, 或多或少全靠商台骷髏會拎左黎做焦點擊股, 到依家市況不穩慢慢回落至$3.5水平, 又開始有返少少吸引力. 大家可以睇返佢上年11月公佈既中期業績, 營業額增長兩成但因為原材料價格開始回復正常而令毛利率下跌, 結果盈利如果撇除物業公允值變動的話其實係輕微下跌. 雖然係咁, 集團惠州市兩間新廠今年2月已經開始運作, 預期對產能同成本控制方面會有多少幫助, 縱然下半年業績唔會有太大驚喜, 甚至可能比上年度出現倒退, 前景都未至於睇得太淡. 個人預計如果全年每股盈利撇除物業重估倒退1成的話, 即大約每股賺$0.51, 全年派息維持不變. 以P/E 6 計目標買入價為 $3.06; 以息率 7%計目標買入價為$3.28.


聯亞集團 (0458.HK)

有關聯亞既簡單分析可以參考舊文, 此股最大賣點係上年既非現金流虧損或許會影響市場對其既估值, 而今年度業績好大可能扭虧為盈, 屆時獲市場重新估計既機會頗大. 當然大家如果參考圖表, 都可以感受到其實重估過程已經在中期業績公佈後不斷進行中, 現價比高位回落約1成但比起公佈中期業績當日已經上升左超過3成. 近日回得比較急既其中一個原因可能係唔知算唔算同業既永嘉(3322)剛公佈一份令人頗失望既全年業績, 但同永嘉唔同既係: 1. 聯亞零售業務係賺緊錢而永嘉蝕緊過億; 2. 聯亞主要市場於美國而永嘉主要市場於歐洲, 當然兩者未必可以直接比較, 但永嘉來自美國既收入增長近倍或許對聯亞有多少啟示所用. 整體來講我預期聯亞今年至少可以賺1億以上, 保守估計當佢賺1億即每股盈利約$0.38, 派息率4成的話即係全年派$0.16. 以P/E 6計目標買入價為$2.28; 以息率7%計目標買入價為$2.28.


寶光實業 (0084.HK)

另一隻我有曾經簡單研究過既公司, 過去3年寶光總盈利為1.87億, 而總已繳稅項為1.54億, 呢個係一個乜野既數字呢? 寶光既弊處在於存貨週轉速度慢, 資金需求較市面上有售既零售同業為高導致負債較多而且派息較少, 而好處在於業績已經衰到貼地, 但事實上又未必係咁差, 形成將來一好一壞既對比可以好大, 可以搏下到時市場會出現過敏症. 保守估計寶光全年可賺1億即每股盈利約為$0.105, 以P/E 8.5計目標買入價為$0.89; 以息率6%計目標買入價為$0.83.


龍記集團 (0255.HK)

有關龍記既簡析可以參考舊文, 主要想補充既係估值方面. 舊文提過佢全年每股可賺$0.48算係一個頗基本既要求, 而另一個賣點在於派息方面, 上市公司一般來講除非下半年賺少左好多, 否則都好少會下半年派息少過上半年, 而且龍記財政比幾年前大幅改善, 響派息上絕對有疏爽條件, 以下半年派$0.18計, 即全年派$0.36, 當然當中有特別息因素, 但若果撇除特別息, 6成左右既派息率每股仍可以派到$0.3. 以P/E 10計目標買入價為$5.0; 以息率6%計目標買入價亦係$5.0.


震雄集團 (0057.HK)

有關震雄既簡析可以參考舊文, 以中期業績黎睇若果撇除近億元既其他收益, 半年亦賺近1.3億即每股賺$0.21, 觀乎過去幾年既表現同埋行內龍頭海天(1882)最近公佈既業績, 震雄全年非常大可能賺2.6億以上, 而個人覺得就算賺到3億都唔出奇, 即每股可賺$0.47而派息率5成即每股派$0.235. 以P/E 9計目標買入價為$4.23; 以息率6%計目標買入價為$3.92.


慕詩國際 (0130.HK)

個人冇深入研究過呢間野, 對佢既認識比較流於表面, 例如 現金流不錯, 現有1.7億現金而0負債; 存貨週轉速度理想; 過去5年有穩定交稅; 派息比率穩定等等...上年公佈既中期業績公司純利1千7百萬即每股賺$0.06, 以過去幾年一般來講下半年都比上半年多賺2倍以上去推算, 全年能夠賺6千萬都唔應該覺得奇怪. 純利6千萬即每股盈利約為$0.21, 但由於此股盈利可測性較低, 估值或許應該向下調多少, 以P/E 8.5計目標買入價為$1.79; 以息率7%計目標買入價為$1.80.


佐丹奴國際 (0709.HK)

雖然個人冇深入研究過呢間野, 但如果純以中期業績推算, 半年賺2億即每股賺$0.135, 若然全年能夠保持相若表現, 即每股可賺約$0.27, 8成派息率計即每股派$0.216, 由於GIORDANO都算係比較名牌既本地零售股, 以P/E 13計目標買入價為$3.5; 以息率6%計目標買入價為$3.6.


經濟日報 (0423.HK)

經濟日報係其中一隻幾值得留意既傳媒股, 尤其係當南華早報(583)同才庫(550)都相應交出唔錯既成績時, 就更突顯經濟日報既投資/投機價值. 始終如果講到廣告收益令盈利提高的話理應人人都可以受惠, 半年已經賺到7千萬, 當佢全年賺1.4億的話即每股賺約$0.32, 派息率5成的話即每股派$0.16, 以P/E 8計目標買入價為$2.56; 以息率6%計目標買入價為$2.67.


信星集團 (1170.HK)

上市超過15年既鞋廠一間, 10年前集團既盈利高峰期應該在04年, 當時全年可賺過億. 但自從失去大客TIMBERLAND之後盈利節節敗退, 股價亦江河日下, 久而久之形成多少估值上既低估, 直至去年公佈業績, 全年再次賺過億後終於獲得市場重新注視, 股價開始回復正常估值. 今年半年賺6千5百萬, 若然佢下半年仍可交到相若表現, 全年可賺1.3億左右即每股賺$0.195, 5成派息率即係每股派$0.0975. 以P/E 8計目標買入價為$1.56; 以息率6.5%計目標買入價為$1.5. 當然呢個係好表面既睇法, 比較實際既係佢交稅交得果3百萬唔夠, 擺明同過億既純利不符, 呢點就要再小心考慮了.


金界控股 (3918.HK)

將金界放於最後一隻講係因為相對來講佢係最冇懸念既一隻. 全年業績已經公佈而且表現不俗, 績後我都有曾經寫過段簡評, 可以參考舊文. 除左核數師令人不放心外, 獨市經營, 派息率高, 財政健康等等條件都頗吸引. 但個人感覺呢隻股總係有多少陰陽怪氣, 尤其係現價$1.49 即P/E 只得9倍而息率高達7.7%實在平得太明顯. 除左透明度較低外, 究竟佢仲有D咩不足之處係我搵唔到呢? 定係一句市場錯價就可以解釋哂?

撈底 底股 小小 補充 修正 PARTIPRAL 派得 得好
PermaLink: https://articles.zkiz.com/?id=23269

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019