ZKIZ Archives


母子檔陪月中介講心又講金

2012-6-21 NM




龍年生仔潮催谷下,陪月員其門若市,不但師奶爭入行,中介公司亦如雨後春筍,越開越多。五十五歲的胡陳彩雲(胡太)○六年入行做陪月,後來不甘中介公司「食水深」,遂「撬走」姊妹,自立門戶,與三十歲的兒子胡家瑋(James),○八年用九萬元開設「好安心」。不過,中介公司門檻低,競爭大,絕非「印印腳」有錢收。胡太和James自度一系列增值服務,由職前培訓、面試技巧到針對準父母的「湊仔班」等,成功羅致四十多名陪月員班底,高峰期月做四十多宗生意。「而家佢哋上晝驗到有咗,下晝就要打嚟book陪月員啦!」胡太笑說。

上週六晚上七時,十八位剛修畢陪月員課程的師奶,在好安心位於太子的辦公室內上堂。「點先知道BB食得夠唔夠奶?」擔任導師的在職護士陳姑娘突然問。一名師奶答道﹕「係咪睇小便顏色,如果茶色就唔得?」另一名師奶即驚呼﹕「嘩,如果茶色就要入院啦!係唔係磅吓條片夠唔夠重呀?」雖然大家都有證書在手,但對陪月知識仍一知半解,陳姑娘惟有再問﹕「咁正常一個BB一日換幾多條片?」「六至八!」台下齊聲道。「咁換少過呢個數目咪知道唔正常囉!」各人恍然大悟,立刻把答案抄在筆記本上。這班師奶個個都希望能成為「星級陪月員」,自此「豬籠入水」。做過陪月員的老闆胡太,知道要做中介,就要摸清陪月員及客人的心理,再「對症下藥」。接下來就由建立班底和吸客兩方面,分析好安心的賺錢方程式。

四招建班底一、招募

現時由非牟利機構如明愛、職工會聯盟等舉辦,獲僱員再培訓局認可的陪月員課程,每年約有五千名畢業生,好安心會定時到不同中心舉辦招聘講座。「一班二十五人,得一、兩個會入行,其餘只為拿到完成課程後約一千二百蚊嘅津貼。」James說,所以要先挑出有心兼有潛質的畢業生。「我哋有免費嘅陪月員分享會,俾新人上來聽吓啲師姐嘅意見,同時推銷工作坊。」James表示,工作坊共四堂,每堂一百二十元,「佢哋肯俾錢再進修,證明真係有心做,我哋亦可以睇表現來揀人。」James指,而客人的喜好亦是重要因素,胡太補充﹕「以前啲客鍾意老啲嘅,覺得資歷深,但而家就鍾意後生嘅,貪佢好氣力,可以大細兼顧,個樣靚啲、有福氣、有肉地嘅亦會受歡迎。」

二、簽約

每次成功轉介一單生意,好安心會收取總薪酬約兩成作為中介費。為確保有足夠陪月員,好安心和二十多個資深陪月員簽訂合約,沒有底薪,但保證一年連續「有工開」,每年續約,而資歷較淺的則簽半年,表現好才能續約。「對佢哋來講,最緊要連續有工開,唔會疊期或有一、兩個月喺屋企坐。試過有陪月員唔續約,自己走去接job,最後都返咗來。」James表示,為加強陪月員的歸屬感,會定時舉行聚會,以及一起做義工。胡太更要兼任心理輔導員,訪問當日,有陪月員致電訴苦,足足傾了一小時。「有時啲有錢人唔係好識尊重人,試過一個富貴人家搵咗幾個陪月員一齊面試,鬥快換尿片。」胡太皺眉道。

三、特訓

陪月員大多半途出家,「未打過住家工」,見客前,James會先教授面試技巧:「試過有姐姐會踢住拖鞋去面試,有啲就著『行政look』,其實著素色衫最好。」另外,陪月員不應留指甲或塗指甲油,避免指甲及化學物刺激到嬰兒,「客人好多時會問陪月員做唔做家務,唔好答『唔做』,要話『BB第一、媽媽第二,其他事有時間就做』。」James教路。另外,他們亦不時請來專業人士為陪月員進行免費講座,如在香港護士協會聘請護士教授餵奶和掃風知識,及邀請社工來教授如何與客人相處,亦有中醫教授產後調理湯水等。「其實陪月員面對最大嘅困難就係婆婆嬤嬤,佢哋覺得自己都識做,成日當住你面話『嘥錢』,又挑剔,為咗避免衝突,我會勸陪月員喺唔傷害到媽媽嘅情況下,盡量跟老人家嘅意思做。」胡太補充。

四、監察

陪月員質素直接影響公司聲譽,客人可於七日內免費更換陪月員,「有時未必係陪月員做得唔好,純粹係唔夾、唔啱傾。試過有陪月員同個婆婆為媽媽嘅飲食日日嘈,就算過咗十日,都照安排換人。」負責帶陪月員面試的胡太,亦會上門家訪,觀察陪月員的工作。公司更有個「師姊妹」制度,安排資歷深的陪月員,在新人上班首星期,每日一電詢問情況。另外,James亦設計了一份問卷予客人,再將問卷原份放上網。「客人反應話唔好嗰啲,我就唔安排工作,等佢自然流失」James說。

兩招吸客一、攞獎搏宣傳

搵客第一步是要打響名堂。開業初期,James試過走到母嬰健康院門外派傳單,及在Yahoo!買關鍵字,成效不大,卻十分昂貴。「而家太多公司搶『陪月』呢個關鍵詞,搶到貴晒,一個點擊成廿幾蚊!」James現時仍有幫襯Yahoo!,但設定每月上限為八千元,「問番啲客,發現八成都係朋友介紹。」James表示,最佳的免費宣傳其實是「攞獎搏見報」,太子辦公室內放了十多個獎項,如香港優質顧客服務協會的優質顧客服務大獎等。James更替陪月員報名參加不同的服務獎項,「對陪月員同公司都好,係雙贏。」James笑說,為增加知名度,過去一年半內,他們做了十多個訪問,連日本的電視台都找上門。

二、開班吸客賺到盡

好安心利用太子的辦公室,開班教準父母「湊BB」,名為「自己做陪月」產前工作坊,由專業護士教導,每個課程四堂,收費九百八十元,每班只限五至六對夫婦,「賣點係小班教學,等佢哋可以落手落腳試做,三、四班入面,就有一、兩對夫妻變咗我哋客人。」James表示,雖然母嬰健康院也有類似課程,但通常一班有三十多人,並安排在平日上班時間,加上有時地點亦不及好安心方便,所以開辦以來都不愁客路,「好多時一開即爆滿,客人要一個月前報名。」James說。

母帶子入行

胡太可說是整盤生意的靈魂人物,一手帶兒子James入行。原在青少年中心任活動工作員的胡太,開朗健談,○六年退休後覺得生活沉悶,便修讀陪月員課程,之後經中介公司找到陪月員工作,「客人同我分開簽約,嗰時未有最低工資,我一個月收六千蚊,有次同個客傾起,先知中介公司收咗佢一萬蚊。」除了「食水深」,亦「不近人情」,「有個客住葵涌,我住將軍澳,問公司一個月可唔可以俾多五百蚊我搭車,佢哋好強硬咁話唔得,但個客原來俾成萬三蚊,公司淨係收錢,咩都無幫過我!」胡太憶述時仍語帶氣憤。最後,竟然是她的第一名客人鼓勵胡太創業。於是,她「膽粗粗」以月租一萬元,租用灣仔服務辦公室,再以較低的佣金,「撬走」一起讀陪月員課程的同學。之後生意不錯,便鼓勵兒子James辭掉員工培訓的工作,全職打理好安心。去年,公司以月租三萬元租用位於太子,約六百呎的單位做辦公室兼課室,「呢度以前係牙醫診所,好乾淨,唔使花錢裝修。」James笑說。現在他和媽媽正撰寫《好安心坐月手冊》,於今年書展出售,除了做宣傳,亦是母子創業路的一個紀念品。

開業資料(02/2008)

租金$10,000宣傳$30,000註冊及律師費$30,000雜費$20,000總投資$90,000

營業資料(05/2012)

營業額$176,000

租金$40,000*

人工$70,000 #

宣傳$15,000

雜費$26,000

盈利$25,000

*太子及灣仔辦公室租金

#連導師薪金及兩名負責人各支薪兩萬元

PermaLink: https://articles.zkiz.com/?id=34492

Next Page

ZKIZ Archives @ 2019