|
||||||
|
電訊盈科主席李澤楷近日認真運滯，剛與女友梁洛施分手，旗下now TV申請免費電視牌照又傳吃白果，連原本氣勢如虹的互動遊戲節目《撳錢》，上月底開始收費後，參加人數亦由六萬人跌至萬多人。據悉，李澤楷正部署將now分拆上市，不惜晚晚豪派十萬大元谷客上台，公司表面風光，但員工連續三年無人工加，內部怨氣爆煲，員工鳥獸散。「小飛俠」離巢 員 工雞飛狗走，其中一個重災區是新聞部，連台柱兼首席主播林燕玲亦即將離巢，轉戰金融界。提起加人工，不少員工都大吐苦水：「舊年金融海嘯後，其他台及傳媒 機構都加人工，惟獨我哋冇！《AM730》都有幾個月花紅啦，大家老闆都有地產背景啫！」一名新聞部員工愈講愈火滾道：「老闆係李澤楷喎，聽落好勁，但原 來唔係，有錢攞嚟派，有乜理由幾個百分點都唔加俾員工？要玩財技就係咁？」
now無人工加，連去年轉職《信報》的前新聞及財經資訊首席副總裁羅燦，亦看不過眼。「我○五年入now，加過一次人工，到舊年走都未再加過。之前我理解係公司要耗巨資爭取英超轉播權，但舊年開始冇咗英超，聽講慳近五億，公司有 錢賺仲唔肯加薪，通脹下等同年年減薪，實在說不過去。」近半年新聞部部分員工離職，now亦無重新聘請，變相縮減人手。單是監製、技術等後勤部門已有約三 分一員工離巢。敢怒不敢言，上月新聞部員工自組十六人「屈機團隊」，參與《撳錢》遊戲，誓言「要喺度攞番自己嗰份！」成功「撳」得三千多元，並拍照放上社 交網站facebook，惹來高層張志剛不悅，發出內部指示禁止在facebook放新聞部照片，或討論對工作的不滿，否則會被上司「接見」。 資料顯示，現客戶人數約一百萬的now，去年中期業績轉虧為盈，除稅及特殊項目（EBITDA）賺四千三百萬元。首嘗甜頭的李澤楷心急執靚盤數谷上市，怎知弄至怨氣沖天，隨時得不償失。 |
||||||