|
||||||
|
八十後常埋怨樓價太高，無能力買樓。 但有一對兄弟，打工幾年已儲夠彈藥上車，不過入市心態卻南轅北轍。做牙醫的阿哥曾漢輝，買樓一直心大心細，結果錯過○八年入市良機。細佬曾漢文大學畢業， 便將十萬元積蓄瞓身買樓，認為越早上車，便可快人一步發達；病理學碩士的他，畢業後全職做地產經紀，一有錢便買樓，現在手持五個單位，市值六百多萬。 兩兄弟各持己見，互相批評對方的不是，且看他們的自白。 左︰曾漢文（細佬） 歲數︰28歲 職業︰地產經紀 右︰曾漢輝（阿哥） 歲數︰29歲 職業︰牙醫 弟：我叫曾漢文，今年廿八歲，阿哥曾漢輝大我一年，自小都喺大埔公屋長大。 兄：我哋的確出身窮，所以由細開始，阿媽已經叫我哋讀多啲書。 弟：講真阿哥讀書叻好多，入到港大讀牙科，我只考到城大讀生物，嗰刻好唔開心，覺得自己好冇用。於是發奮讀書，結果考到一級榮譽畢業，仲有獎學金入港大讀病理學碩士，心情先至舒服啲。 媽：要比較兩兄弟，阿哥真係乖啲，細時每逢默書測驗，都會自動波溫書，唔使我勞氣；細佬就貪玩囉，成日拆散玩具。 我唔放心細佬，怕佢無所事事，暑假就叫佢去我做嗰間地產代理做文職兼職，可能佢近得我多，碩士畢業竟然話要做代理，激到我彈起，都唔知係咪我害咗個仔？ 弟：做地產有咩唔好？畢業後留喺實驗室做研究，每個月搵得萬五、六蚊，肯定儲唔到首期。再講，做落先知唔少人都係靠買層細價樓上車，之後細屋換大屋。 阿哥投資自己 兄：我認為做人最緊要有事業，有閒錢先去投資。牙科畢業後，我喺其他診所打咗幾年工，一個月有六、七萬元，但都堅持要開自己嘅診所，半年前終於如願，初期收入肯定差啲，賺得三、四萬，但總算儲到自己嘅熟客。 我哋呢個年紀，最大嘅投資應該係自己，你買晒樓，就係用投資決定你嘅事業，好危險。 弟：人生第一桶金，一定要靠買樓，你俾咗首期，之後放租就有人幫你供樓，不知幾好。我廿五歲已經上車，讀緊書盡用助學金及利是錢，四十萬元買入林村一間村屋放租，個個月供完樓，仲有千幾蚊落袋，我睇唔到有乜壞處。 兄：我打工都儲到筆錢做首期，但我想近啲返工，唔會揀大埔，最好係市區新樓。○八年睇過碧海藍天，夠俾三成首期，但又心大心細。唉！嗰時三百幾萬，依家升到四百幾萬，真係揼心！ 弟：阿哥，買樓最緊要爽快，之前我買層大埔翠屏花園，睇咗一次就扑槌，收租一年，舊年賣咗，賺了六十萬。上個月我仲買埋車位，睇都未睇過，見廿五萬合理即買。 兄：阿文，歷史只會不斷重演，樓價升同低息唔係永恒o架。我情願繼續買高息的澳元同藍籌股，仲有做定存及月供基金。 弟：我只想提早退休，依家幾層樓都有人幫我供，我坐喺度「印印腳」收租，你就要日做夜做喎。阿媽都成日催你買樓啦，我真係唔明你點解仲唔上車？ 兄：我冇住樓嘅急切性，同阿媽住仲可以慳唔少，所以都係開診所為先。 弟：咁你又租我度？我賣咗翠屏筆錢，用嚟俾大埔廣場嘅首期，間屋啱啱用咗十幾萬裝修，打算趁個市好賣出去，不過阿媽話要俾你住，仲要五千蚊租咁平，出面租緊七千幾o架，真係阻住晒。 兄：黐線！你租俾我簡直超正，我會錫住間屋，又唔使驚租霸。依家賣咗層樓，你拎住咁大嚿錢有咩用？銀行零息，冇理由再高價入市嘛。 媽：阿輝，我都唔幫你，身邊嘅人成日話你黐住屋企，我都覺得你咁大個仔，應該試吓自己住，搬咗半年都應該慣啦，係時候諗吓置業。 細佬專攻外國客 弟：我做地產，絕對唔係想像咁易，最初乜都唔識，就好俾心機打電話、貼街招，仲成日入村逐間村屋拍門，問人哋放唔放盤，就連網上介紹啲字都打得多過人。 媽：我都係做村屋經紀，主要做香港人生意，但細佬竟然搵到外國人，曾經半年賺四十萬佣金。 弟：我勝在英文比較好，於是開發新市場，不過最初打去外國人嘅公司，多數被接待人員或秘書擋住。之後諗到趁食飯時間，公司人較少，講英文混水摸魚駁入去，間唔中都可以與目標嘅外國人直接對話，先有機會進行買賣。 大部分外國客唔慣住一層，通常成幢連花園買，所以我做開都係村屋嘅大刁。最記得有個外國客成千萬買咗幢大埔山頂花園，但依然唔滿意花園得五百呎，我就提議 佢買埋隔鄰塊地，幫佢查有冇人拿了丁權去發展，最後用九百幾萬買咗成千呎地皮，o依家鋪晒假草地同放個吹氣泳池，夠晒佢個仔同隻狗玩。 阿媽帶挈轉工 媽：○九年，我入行的地產鋪老闆向我求救，話公司生意唔掂，叫我返去幫手，但嗰時我已經同拍檔開了自己的地產鋪，分唔到身，於是叫細佬試吓。 弟：我加盟時，成間公司得五個人，只掛住起村屋，忽略二手買賣，最恐怖係成間公司冇電腦，營業額好差。老闆見我有兩年買賣村屋經驗，就放膽俾我一年內請咗 廿個人，開多兩間分行，佢覺得我令公司起死回生，仲送咗少少股份俾我。前線營業額好，我都有錢分，每個月分到七萬元。 兄：你真係要多謝阿媽介紹你入去，否則你點有機會轉工？ 弟：我都知！呢間公司優點是自己有啲新界地，依家仲不斷收丁權起村屋，每幢可賺三百萬。雖然起樓我冇份分錢，但係公司有樓起，我做前線就唔怕冇盤放。 兄：點都好！大家目標唔同啫，你五十歲前要有八至九層供完嘅樓，但我想等診所上了軌道，再喺大埔開多間分店。 弟：唓！你開大埔分店無非貪阿媽喺大埔識得人多。 兄：係吖，咁又點？ 媽：咁你應該信阿媽，買層大埔樓上車先。 兄：又嚟…… |
||||||