|
||||||
|
新春賀歲檔期，戲院大收旺場，電影公司豬籠入水，同時帶挈Backdrop House老闆何希彥（Tony）發了筆新年財。主力為電影公司製作宣傳品的Backdrop House，客仔包括寰亞及英皇等大公司，近期戲院到處可見《讓子彈飛》、《最強囍事》的宣傳品，如座地紙牌、海報等，便出自Tony公司。 三十三歲的Tony，年紀輕輕已有兩次創業經驗。先是十年前與兩位拍檔成立數碼噴畫公司BannerSHOP，首創二十四小時營業，雄霸散客市場。至○八年，Tony決心自立門戶，主攻電影宣傳品。憑着三招撳錢方法，搶佔香港電影噴畫宣傳品大半領土，再打入背幕製作及牆紙市場，上月淨賺十七萬。 Backdrop House的收入與電影市道同起同落，過去兩、三個月，傳統的電影旺季，中、港大片接連上畫， Tony亦忙得不亦樂乎。「電影《讓子彈飛》的宣傳品喺平安夜當日落單，四個立體人形企牌，十五個單層企牌，及十一張海報，二十六號就要派到全港三十間戲 院，假都冇得放，呵呵。」Tony笑說，這單生意總值二萬多元，是最佳聖誕禮物。「《最強囍事》仲急，一月中落單，即日起貨，第二日就已經擺晒喺三十幾間 戲院。單生意成三萬幾蚊，幾急都要做啦。」Tony表示，通常電影上畫前一個月，各式宣傳品就要在所有院線擺好陣，亦是公司最忙的時候。 以立體人形企牌取代過往的易拉架，正是Backdrop House的「王牌」產品。現時，英皇、寰亞、寰宇等十間電影公司都是Tony的固定客戶，上月旺季的生意額達三十五萬，佔公司收 入逾七成。事實上，由Tony一手打造的Backdrop House原本只是 BannerSHOP的一個部門，每月盈利只有萬餘元，得不到其他股東的重視。Tony索性放棄股份，帶同電影宣傳品業務出走，自立門戶，用近五十萬購入 兩台HP Design Jet L25500打印機，並在土瓜灣租下一個二千多呎的工廈單位作為工場兼辦公室，便開門迎客，更憑着以下三招撳錢大法，長做長有，成功開創新天地。 第一招︰貼身服務 本身是音響發燒友的Tony，最初用高級音響品牌NAGRA作為新公司名，並刻意打造成電影宣傳品專門店。最初，公司只有英皇、華納、IVL三個舊客，Tony 主動聯絡各大電影公司的宣傳部，推銷產品。「當時行內習慣用五毫米厚的發泡膠板，我就改用十毫米，做出來更穩陣。」Tony表示，對比其他「乜都做」的噴畫公司，NAGRA專門店的定位，更能夠迎合電影公司的要求，以度身訂做為賣點。「開業初期，為了加強客人信心，我會先做一個兩呎高的迷你版模型，俾電影公司檢驗做工，色版都要做兩轉。另外，圖形切割亦細緻好多，令人形更立體。」 熟客之一的寰亞電影，其市場拓展高級經理Kitty就特別提到Tony的「驚喜」服務。「我在一本日本雜誌睇到一個拉球的kick off儀式好特別，就想用在《新宿事件》的宣傳會上，但從未試過，好怕到時成龍等大牌拉唔開會好尷尬。但Tony一口應承，做埋辦拍埋片俾我睇。結果當日 成龍一拉開個金球，就有無數碎花飄落，仲有條票房口號banner垂下，到依家都印象深刻。」 此外，Tony亦會依據客人的預算提供貼身意見。「好似《最強囍事》呢套戲，宣傳預算充足，客人想做得豪啲，我就建議在多層次企牌上加一層鏡面，感覺新穎，亦配合主題。」 性格開朗的Tony，與Kitty等電影公司宣傳人員老友鬼鬼，一見面就滿口電影經。「一定要睇戲先有共同話題，有個客連屋企裝修都打來問我。早前《讓子彈飛》開發布會，想要幾個筒子面具，我專門搵來麻布幫佢哋印上去，氹得佢哋好開心。」Tony笑說。 第二招︰以快打快 除了貼身服務，做電影公司生意更要夠快。「依家嘅電影公司宣傳任務越來越多，設計理念又更要求精良，留給製作的時間由原來的一個星期，縮短至兩至三日，一定要配合到客人的步伐。」Tony說。 列印機是效率的先決條件。目前Tony選用的HP Design Jet L25500，二十分鐘可出一個五呎乘七呎的標準人形企牌，Tony計過數，每日開機十八小時，每小時出產三件，兩台機每日的生產量就可過百件，每套戲每 張訂單約十至二十個立體牌，即使每個有三至四個層次，亦足以應付需要。現在，Tony一接到電影公司的設計稿和訂金，就即時開機列印，出一張就以人手裱裁一張，最快即日便可起貨，並第二日安排出貨安裝，第三日就放好在戲院。 扣除材料、油墨及運輸等開支，公司毛利約三成半。「最常用的海報貼紙一卷一百米就要二百元，發泡膠板從廣州GapeWay分銷商訂購，四呎乘八呎一塊連運費約一百二十元，HP原裝油墨每公升一千一百多元。原材料唔慳得，唯有靠薄利多銷。」Tony表示，有時，為了氹客，明知無錢賺亦要硬食。「試過有間電影公司的宣傳品預算只有幾千元，但又要layer又趕時間，我唯有就位來裁，每出五張就拿去戲院裝咗先，根本冇得賺！」但由於「抵得諗」，Tony成為多間電影公司指定宣傳品製作商。 第三招︰變通拓財路 電影宣傳生意每月盈利已維持十萬左右，但考慮到電影市道未必年年旺場，Tony便度「橋」拓展新客路。首先是室內新式背景板，用發泡板、PVC板等可即棄 的材料，代替將背幕布釘在木板上的傳統製作方式。「做傳統backdrop，要運木板，又起碼要請兩個有裝修底的師傅安裝，還要包回收；如果用發泡板製 作，一個普通員工已可送貨兼安裝，用完即棄，單係人工就可慳一半以上。」以一個八呎乘三十二呎的背景板為例，安裝時間由個半鐘縮減至最快三十五分鐘，定價 不到六千元，比傳統背幕平近兩成。 配合新業務，Tony索性將公司改名為Backdrop House，在Yahoo、Google搜尋引擎買關鍵字，及在《新婚通訊》等結婚雜誌賣廣告。「很多新人鍾意用結婚相做一個backdrop放在迎賓位俾客人簽名，再加一個迷你版俾人影相，總共六千多元，比一些中介公司，如婚慶策劃和攝影公司，便宜三分一。」Tony表示，室內布景板生意，已佔公司生意額近三成。 最近Tony又有新搞作，就是牆紙打印。「客人可提供自己畫作的電子版，印出來就成為個性化牆紙，背面恍如郵票遇水便產生黏性，可以穩貼在所有防水牆 身。」這項新業務在一班熟客中頗受歡迎，推出兩個多月就成功接到二十多單生意，Tony表示目前並未正式定價，「大概十五元一呎，廿五元包安裝，普通一面 牆兩、三千就有交易。除了牆紙，枱布、床單都可有類似做法，而家居市場將會更大，有更多可能。」 開業資料（2008年2月） 租金▲︰$48,000 器材*︰$570,000 裝修︰$30,000 雜費︰$30,000 總投資︰$678,000 ▲三個月按金，一個月上期 *包括2台列印機，1台裱機，6部電腦 營業資料（2011年1月） 營業額︰$495,000 租金︰$12,000 材料︰$130,000 人工＃︰$150,000 廣告︰$5,000 水電︰$2,000 運輸︰$20,000 盈利︰$176,000 ＃包括11名全職及老闆人工三萬 舊拍檔點睇 記：記者傅：Benny 記：點解BannerSHOP唔做電影宣傳品？ 傅：BannerSHOP特色係快，主攻散客，而電影公司需要貼身服務，如改動設計圖及包安裝等，同我哋公司嘅理念相違背。 記：點睇Tony呢個舊拍檔？ 傅：我哋仲有聯絡，有時仲會互相介紹生意。佢聰明、有幹勁及有創意，對機器有研究，依家公司用緊嘅HP Scitex TJ8500巨型噴畫機都係他提議引入。 記：點睇Backdrop House嘅定位？ 傅：轉攻室內發泡板背幕的路線正確，能突破傳統，又有七成穩定嘅電影公司客源做支援。但我覺得「針冇多頭利」，業務多元化會面對人力調配及機器產量問題，而且產品及技術如發泡板背幕和易拉架很容易被人抄襲。 記：目前BannerSHOP每月盈利？ 傅：Tony同你講佢一個月賺幾多？ 記：十幾萬。 傅：我都是賺十幾萬啦。 |
||||||