魚樂無窮：快快樂樂去炒股
1 :
GS(14)@2017-02-07 05:14:08好多戰友都愛問我，一隻股票如何定止賺止蝕位，講真，大家承受風險能力不同，好難一概而論，正如我嘅衫你唔會啱着，你嘅鞋我亦未必喜歡，炒股道理一樣。不過有一項招式，卻人人都啱用，就係所有動作都分段做，包括買貨、食糊、止蝕等。始終金融市場千變萬化，股價呢一秒同下一秒可以相差好遠，分段操作既可將成本、利潤、虧損平均化，減低風險，心理上亦會得到平衡。唔信？你諗番你自己做嘅trade，其中一注買到或者沽到靚價，係咪已經足夠你開心上大半天？去年12月初推介同聲同氣的太陽世紀（1383）及聯太工業（176），前者供股後一直穩守供股價0.2元，近日在大成交下輕易衝破3毫子，肯坐定定又可以贏足五成，認真和味。聯太工業方面，全購要約已變成無條件，每股作價0.493元，第二輪要約將在明日（周三）結束，昨日股價再次蠢動，話唔定有聰明錢率先部署。聯太最新市值7億銀，有近5億銀NAV墊底，用全購價作止蝕位，憧憬公司大變身，夠晒值博率，能否好似太陽世紀咁勁，則屬後話。
唐牛
http://www.fb.com/tongcow88本欄逢周二、四刊出
來源:
http://hk.apple.nextmedia.com/financeestate/art/20170207/19920046