海洋公園公布成績表，面臨過去廿幾年嚟最勁嘅，蝕咗兩億四，嚇到全世界眼都突。
海洋公園勁蝕成咁，有啲人梗係賴自由行客少咗之類。大佬，廿九年以嚟最勁虧損喎，比沙士果陣仲要差，你同我講自由行少咗有關，我中環客真係想講：你講呢啲。
其實海洋公園勁蝕，梁振英一定要負責任。 海洋公園有段時期，成績好過香港迪士尼樂園，而 海洋公園 嘅成功，同蘭桂坊之父盛智文大有關係。
中環客認為董建華少數正確嘅決定，就係搵盛智文接管 海洋公園 ，盛智文自己落場扮鬼扮馬，marketing上不斷有noise，又改善喺主題公園裡面客人嘅experience，所以盛智文管理 海洋公園 果十一年成績都好好。主題公園係好睇掌舵果個人識唔識管，好似東京迪士尼係全世界最成功嘅一個，都係因為班日本仔識管，而唔係美國佬叻。
依家梁振英搵孔令成管 海洋公園 ，結果搞到 海洋公園 蝕得最勁。如果梁生係一間公司嘅CEO嘅話，梁生所託非人已經炒得。如果我係立法會議員，實會質問，邊個決定炒盛智文。
依家做得唔好，仲要加價，證明依家 海洋公園 由傻佬去管，我祝 海洋公園 好運。
中環客