ZKIZ Archives


男人臨急抱佛腳正日先買禮物 金至尊黃英豪:情人節檔最短癮 李華華

2011-2-14  AD




 

今日係一年一度情人節,華華喺呢度祝大家有情人終成眷屬!喺財經界打滾嘅華華,即使喺咁浪漫嘅日子,第一時間都係諗有咩情人節概念股可以炒吓。事關今年經濟好番,消費市道又暢旺,相信各位商家要喺情人節賺個滿堂紅,應該冇乜難度!

生意比平時多一倍

可 惜香港上市公司嘅業務種類雖然五花八門,但係就冇「朱古力股」同「花股」,而同情人節關係最大嘅,似乎只有珠寶首飾股!好似經營金至尊嘅香港資源 (2882)主席黃英豪就同華華講,今年香港市民手頭都幾鬆吓,相信各位男士都唔會吝嗇買禮物吓另一半,佢估計單係情人節一日,生意額就會比平時多一 倍!都咪話唔犀利!

不過,唔好以為做情人節生意,可以好似其他黃金周咁,起碼帶旺一個禮拜,黃英豪話,原來情人節嘅生意通常只會集中喺一日,即係2月14日正日,之前嗰幾日 生意咪又係平日咁。乜買禮物唔係應該事先買定嘅咩?黃英豪就用男人嘅思維解釋畀華華聽,原來大部份男人都係臨急抱佛腳,即日先買,亦有男士可能要睇吓當日 約到邊個,先決定送咩咁囉!

周大福珠寶董事古堂發都同華華講,今年情人節喺農曆年初十二,相信新年嘅旺市可以帶埋落情人節,估計單係情人節 禮品嘅生意,就比去年同期多兩至三成。今年周大福第一次同花店合作,推出足金玫瑰,加配鮮花組合,希望攻陷女人嘅心之餘,攻陷埋男人個荷包,一set盛惠 1.6萬蚊起。各位男士可以諗諗佢!

李華華


PermaLink: https://articles.zkiz.com/?id=22460

Next Page

ZKIZ Archives @ 2019