ZKIZ Archives


橫財弗易 左丁山

2011-2-14  AD




 

馬主N從澳洲打 電話嚟,話佢人在雪梨,周末要睇一場一級大賽,又碰啱佢隻馬在星期六出場跑泥地,叫左丁山代佢落沙圈督師,贏得出就代佢拉埋頭馬影相。係唔係呀,佢隻馬來 港以後從無表現,得十六分啫喎,點贏?不過既然叫到,一於依時在沙圈出現可也。馬主N猛話澳洲紙太貴,貴過美元,搞到佢買馬找數時,鬼咁肉痛。澳洲可能係 福地,東部南部有水災風災,西部有火災,但澳元就堅挺到極,升到你唔信,有澳洲紙收益嘅朋友,恭喜晒!支持仔女在澳洲讀緊書嘅朋友,好同情你地。

左 丁山呢排賭運麻麻,買阿仙奴讓球客勝,見上半場已經入咗紐卡素四比○,當然心花怒放,點知下半場竟然踢成四比四,為之儍咗,嬲起上來立即下大啲注碼,買曼 聯讓球客勝,然後上床瞓覺,點知第二朝起身一睇,今季無敵嘅榜首隊伍曼聯竟然輸咗畀包尾大幡降班膽狼隊一比二,點會唔心實吖。運氣如此,實在無話可說,新 年到車公廟求籤,一支求橫財馬運,得到中籤,要義就係不宜希望太多。返到屋企翻查二十年來嘅車公籤,發覺自身、事業運有起有跌,上中下籤都求到過,唯獨是 橫財呢方面,二十年來都係得到中籤,含義十分前後一貫,總係叫左丁山小心謹慎,不可賭博投機。好彩聽晒話,每次都係小注怡情,量力而為啫。

 

抱 住咁嘅心情,對馬主N之言,不敢有大期望,買本《大贏》馬經望一望,隻馬嘅紀錄真係幾差,點敢捧場呀。講起馬經,以前一直睇開嘅《幸運》,今季已停刊,惡 佬明介紹睇《大贏》,冇乜所謂嘞,但呢本馬經幾趣怪,惡佬明今季已有兩次,一次在灣仔,一次在沙田,分別買到上一次賽馬嘅《大贏》,佢又冇睇清楚喎,某星 期日入到馬場打開一望,先知道買咗舊嘅星期三夜馬版本,又有一次打開之後,發覺裏面有兩三版開了天窗,為之啼笑皆非。左丁山上星期三(二月九日)嗰本《大 贏 》,封面底刊載嘅賽馬日期竟然係2009/10年嘅,做出版做到咁輕鬆,都算少有!


PermaLink: https://articles.zkiz.com/?id=22457

Next Page

ZKIZ Archives @ 2019