資深賓架拎起L君份全版聲明，慨然而嘆，曰：L博士只可以分到二十個億，冇得再多矣。何以咁講? 按照普通法，以佢哋兩個過去之關係、生埋兩個子女，一旦L君騎鶴西去，L博士大可以憑其「實質妻子身份」（de facto wife 即係妾侍）上法庭要求分身家。家吓L君份聲明講到明，L博士有大宅住，有汽車、飛機使，另加生活費，並非情緣未了；成個安排，「純屬為方便照顧兩名年幼子女。」即係話L博士嘅地位，好聽啲，係保母（nanny)；講得白啲，係家務助理（DA)。出呢份告白，為求萬無一失而已。憶昔胡百全（余若薇夫家阿叔）坐喺立法局之時，佢位紅顏知己夏蕙BB要入門做妾侍（係咪想分身家只有胡大狀至知），為防有失，佢於是提出私人草案，取消大清律例。自此香港人多得胡大狀唔少，冇得納妾，而夏蕙BB亦冇得入門。L君顯然覺得咁都未夠保險，於是益全港報紙（一日咁多啦！），登頭版聲明。L博士第一時間網上作英文回應，祝願L君早日康復，做番個loving and wonderful father。全篇公告唔見husband一字。旁人睇嚟，似係扯晒白旗囉。L君止蝕有法，勁！ 鬍鬚曾阿松午間小聚 近排有人見過鬍鬚曾喺午飯時間，摸上阿松中半山屋企短聚，特首戰已開鑼，鬍鬚曾依然to be or not to be，未敢亮劍，究竟兩位前任及現任財爺有乜密偈，要避開耳目喺屋企傾呢？突然有高官駕臨，「實Q」都會識問，that's the question。 中環寸嘴今鋪睇習大大有冇China bone 呢排班港英餘孽忽然變身愛國分子，唔好講咁多國家主權，領土完整，最緊要保持人民有飯開，其實香港人「愛國」、「愛港」，又愛「銀紙」！如果去深究，「china」呢個英文，都係辱華o架，啲英國佬最識黑色幽默，如果你做棺材做得出色，就賜Coffin個姓俾你，如果做管家做得好，就賜個姓叫Butler，英國佬將自己放到高高在上，欣賞你中國人瓷器技術了得，就賜你國家英文名叫China，恐防你啲土炮子俾人幽咗一默都唔識解救，後來英國佬發明咗製作骨瓷，就叫bone china，又薄身，又硬淨，唔係好似我哋啲富三代，撼唔過啲缸瓦嘅；中國文化講「傲骨」，唔係「熬豬骨湯」嗰啲熬骨噃，以往英國出名做骨瓷如Wedgwood, Royal Doulton，如今都搬咗去大陸OEM生產，習大大話晒三十年前去過美國料理農務，過冷河（註：一九八五年，當年習近平以河北正定縣委書記身份，率領一個畜牧業訪問團，到Iowa州，訪問一家農場，並在偏遠的Muscatin小鎮留宿兩晚。）習主席點同候任大鱷美國總統周旋，呢鋪睇您啦！ 楊國佳工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 毛玉萍娶新抱菜式解讀 毛玉萍娶新抱，喺舊會展大排筵席八十圍，六點鐘cocktail，九點半先起筷，個菜單有五道措辭華麗嘅菜式，不過睇咗都唔知有乜落肚。 1海蜇絲、一件小乳豬加三粒牛柳2少少花膠、魚肚、半粒瑤柱加肇菜3鮮鮑、海參加上海白菜4豉油碗咁大嘅飯，加炸子雞一件及兩粒水餃5布丁加笑口棗以及少少生果 | ||