|
||||||
|
富豪要點樣處理好自己嘅身家，相信都係大家呢排茶餘飯後嘅熱門話題。不過，宏橋（1378）嘅張士平喺呢方面就應該唔使點煩，事關佢一早已經安排好啲仔女打理唔同公司，各司其職，都算幾清楚！ 好 似上市多年嘅魏穚紡織（2698），就一直由現年38歲嘅大女張紅霞揸fit，出任董事長；34歲嘅二女張豔紅就做執行董事，幫吓手咁。至於o依家招緊股 嘅宏橋，就由41歲嘅仔張波負責，做行政總裁，董事長就依然係張士平。女嘅負責紡紗；男嘅就負責煉鋼，張總睇嚟都幾傳統吓喎！ 不過，話時話，華華覺得家族企業最緊要係搞好啲企業管治。好似宏橋咁，董事會之中9個成員，4個已經係屋企人，老竇、阿媽、阿仔同女婿齊齊坐晒入局，陣容會唔會強大咗啲呢？而且各位董事同非上市集團之間嘅職務重叠，多到嚇死人。 華華仲記得，06年魏穚紡織曾經違反咗一啲持續關連交易嘅申報規定，搞到張總要俾港交所罰上15個鐘頭堂。希望宏橋今次醒醒定定，唔好累張總俾人罰上堂呀！ |
||||||