|
||||||
|
何鴻燊律師入稟 控告何二太、何三太（所謂二房、三房）及一位董事共十一人，正是Ho vs Ho，好睇過花燈，如果不在庭外和解，要在庭上辯證嘅話，啲打爭產官司嘅大律師就發咯。陳振聰之千億爭產案，因龔如心已逝，死無對證，但今天「何告何」， 何先生仍然健在，識讀字、識講嘢噃，會否被傳召上庭作供呢？呢場肯定係世紀官司，墟冚過陳振聰，國際記者全部識何鴻燊，FT、WSJ、IHT已將故事以大 篇幅報導，開審之日，一定轟動全球。對何家以至亞洲富豪家庭之形象，冇乜好處，香港更有可能得到一個花名：「亞洲爭產之都」！ 為咗呢單分產 新聞，記者做到氣咳，在賭王淺水灣大宅與二房、三房之間豪宅跑來跑去，站在街頭捱冷風，一位女記在FB與同行「分享」云：「我又係叫做H超×，好多個阿超 有錢分，我呢個阿超就一定冇，在街頭撲來撲去唔知做乜？」（並非原文，大意如此）做得辛苦，發吓牢騷啫，人手多嘅報館，咪體貼僱員，分兩更記者嚟做囉，最 弊係星期三晚上又爆出殼王陳國強與台灣王永慶二房千金王雪紅及美國私募基金收購邵氏（香港）手上之TVB 26%股權，財經版編採人員更加做到死。左丁山在馬場聽到呢單消息，立即打電話問大編輯攞料，大編輯話：「你繼續賭馬啦，我死都要唞啖氣至得o架！」 諗 深一層，陳國強老早已經為無綫捱義氣，接咗無綫衞星電視（收費電視）一啲股權，明知蝕都肯制，應該係方小姐之忠心朋友喇啩，既然邵氏有意沽售無綫股權，同 碧桂園楊生，恒基李生傾極埋唔到欄，陳國強心生一計，去傾埋一份，不算意外。殼王精於財技，身邊謀臣多，老友多，憑各方關係搭通天線搵到王雪紅、 Providence Equity Partners入股，唔算係冷門。 |
||||||